جنیوا۔ 04 اکتوبر (اے پی پی) بنجائی وزیر موسمیاتی بدلی شیری رحمان موسمیاتی بدلی ءِ پوسکن آ دور انااسہ بھلو چیلنج اس گوندسا پارینے کہ پاکستان اٹی موسمیاتی بدلی نا سوب آن نوکاپ آن بھلو کچ اسے آ بھسکاری مس، حکومت غٹ وسیلہ غاتے کاریم اٹ اتسا زہمی تا بحالی کن گام گیج کننگ اٹی ءِ، ننے ہلہلہ ئی بنداو تیا دوائی و طبی آسراتی تا گرج ءِ، زہمی تے یخ آن بچفنگ کن ہم گام گیج کروئی مریک، نوکاپ آن زہمی تا کمک کن دنیا مون آ برے۔ داخیال آتا درشانی ءِ او سے شنبے نادے آ جنیوا ٹی نوکاپ آن زہمی تیکن پاکستان و اقوام متحدہ نا اسیجائی نظرثانی مروک فلیش2022اپیل نا بنانا دود آن تران کرساکرے۔ بنجائی وزیر پارے کہ موسمیاتی بدلی ٹی پاکستان نا بشخ اسہ درسد آن ہم کم ءِ، موسمیاتی بدلی نا اثرآتیٹی شون ہلوک ملک آتا زمواری زیات ءِ، دنیا ءِ موسمیاتی بدلی ناچیلنج مون تروک ءِ، پوسکن آ دور انا چندی چیلنج آتیٹی موسمیاتی بدلی اسہ بھلو چیلنج اسے۔ اوپارے کہ موسمیاتی بدلی آن پاکستان بھاز بے وڑ زہمی مسنے، ساڑی آ نوکاپ موسمیاتی بدلی نا اسہ پیدوار ءُ درور اسے، پاکستان اٹی بھلو کچ اسے آ نوکاپ آن بھسکاری مسنے ولے دا بھسکاری ناشمار صدی نا غٹ آن بھلا آفت اٹی مننگ کیک۔ اوپارے کہ نوکاپ آن 1700 آن زیات بندغ زوال کرینو، ساڑی آ نوکاپ آن پاکستان اٹی بھلو کچ اسے آ مخلوق نا اُرا و ملکیت آتے نسخان رسینگانے، نن داسہ ہم ریسکیو و ریلیف نا ریسہ غاتیٹی اُن، نوکاپ آن زہمی تا بحالی اسہ بھاز بھلو چیلنج اسے۔ ساڑی آ نوکاپ اٹی بھلو کچ اسے آ مخلوق مرک کرینے۔ حکومت نوکاپ آن زہمی تا بحالی کن گام گیج کننگ اٹی ءِ۔ اوپارے کہ پِر ونوکاپ آن ملک انا کشت وکشار و بنداوی پنجر ءِ بھاز نسخان رسینگانے، نوکاپ زہمی علاقہ غاتیٹی داسہ ہم لکھ آ مخلوق کمک نا چاری ءِ، داسہ ہم چندی علاقہ غاتیٹی نوکاپی دیر سلوک ءِ، ننے ہلہلہ ئی بنداو تیا دوائی و طبی آسراتی تا گرج ءِ۔ اوپارے کہ یخ انا موسم بننگ والا ءِ، نوکاپ آن زہمی تے یخ آن بچفنگ کن گام گیج کروئی مریک۔ پاکستان اٹی نوکاپ زہمی تا کمک کن دنیا مون آ برے، حکومت نوکاپ آن زہمی تا کمک کن غٹ دوئی وسیلہ غاتے کاریم اٹ اتنگ ءِ، پاکستان تنیا نوکاپ نا بھسکاری تتون مون تننگ کپک، موسمیاتی بدلی تون مون تننگ کن جہانی کہول آ گام گیج کننگے۔
