اسلام آباد۔ 04 اکتوبر (اے پی پی) اسپیکر قومی اسمبلی راجہ پرویز اشرف تون آسٹریلوی ہائی کمشنر نیل ہاکنز سے شنبے نادے آ پارلیمنٹ ہاؤس اٹی اوڑدہی کرے۔ اوڑدہی ٹی ہڑتوم آ کنڈآتا تعلقداری تون اوار تین پہ تینی است خواہی نا ایلو امور آ گپ وتران کننگا۔ اسپیکر داوخت آ گپ وتران کرسا پارے کہ پاکستان آسٹریلیا تون دوستانہ تعلقداری تے قدر انا نظر اٹ ہرک۔ ہڑتوم آ ملک آتا نیام اٹ پارلیمانی رابطہ و اقتصادی کمکاری ٹی پین ودکی المی ءِ۔ پاک آسٹریلیا پارلیمانی سنگتی ٹولی پارلیمانی سفارتکاری ٹی اہم ءُ کڑد اس ادا کننگ ءِ۔ اوپارے کہ ہڑتوم آملک آتا کاروباری برادری نا نیام اٹ رابطہ غاتا مون آ دننگ المی ءِ، پاکستان ءِ ساڑی بھسکار نوکاپ آن بھلو کچ اسے آ جانی ومالی نسخان ہرفوئی تمانے۔ 11 آن 15اکتوبر اسکان روانڈا ٹی 145 می بین الپارلیمانی یونین (آئی پی یو) نا جنرل اسمبلی دیوان اڈہلنگ والا ءِ۔ دادیوان اٹی پاکستان نا قومی اسمبلی موسمیاتی بدلی تیان مروک آ نسخان تا پوروی کن ہلہلہ ئی قرارداد پیش کننگ نا خواست کرینے۔ قرارداد نا مسخت پاکستان کون آ پدتموک ملک آتیٹی موسمیاتی بدلی تیان مروک آ بے بدل نسخان تا پوروی کن جہانی فنڈ کننگ ءِ۔ اسپیکر پاکستان اٹی نوکاپ آن زہمی تیکن کمک و بحالی کن آسٹریلوی حکومت نا کمکاری نا ستاءِ کرے۔ آسٹریلوی ہائی کمشنر پارے کہ آسٹریلیا پاکستان ءِ تینا باپت سنگت و اہم اقتصادی شریدار تکک، ننا زرکارآک پاکستان اٹی زرکاری نا خواہندار ءُ۔ آسٹریلیا موسمیاتی تنکی تون مون تننگ کن آئی پی یو ناکمک اٹ جہانی فنڈ انا ٹہیفنگ کن قومی اسمبلی آف پاکستان نا خواست انا مخ تفی نا باورکرفک۔
