پاکستان یورپی یونین تون اسیجائی قدر، امن و شونہالی و شونداری نا مسخت آتیا تالان تعلقداری تے بھاز اہمیت ایتک، وزیراعظم شہباز شریف

اسلام آباد۔ 04 اکتوبر (اے پی پی) وزیراعظم محمد شہباز شریف پارینے کہ پاکستان اسیجائی قدر ، امن و شونہالی و شونداری نا مسخت آتیا تالان یورپی یونین تون تینا تعلقداری تے بھاز اہمیت ایتک، پاکستان نا جہانی کہول آ کاربن نا پیش تمنگ اٹ حصہ دار مفننگ آن پد ہم چاگڑدی بدلی تا اثرآتیان غٹ آن زیات زہمی مروک آ ملک آتیٹی اوار ءِ، اومیت ءِ کہ جہانی برادری بحالی و تعمیر نو نا ریسہ ٹی گچین بشخ ہلنگ نا کمک اٹ نوکاپ آن ودی مروک آ حالیت آتا منفی اثرآتون مون تننگ نا کوشست آتے ترند کیک۔ اوداخیال آتا درشانی ءِ یورپی کمشنر کرائسز مینجمنٹ جینز لینار کیچ تون گپ وتران کرسا کرے ہرا سے شنبے نادے آ داڑے اوڑتون اوڑدہی کرے۔ وزیراعظم پاکستان اٹی موسمیاتی بدلی تا سوب نوکاپ آن پد یورپی یونین نا کنڈآ ن امداد نا ستاءِ کرے و اودے نوکاپ آن فصل، ہند، ساہدار و بنداوی پنجر ءِ مروک آ نسخان و 1600 آن زیات بندغ آتا زوال کننگ نا بابت معلومدار کرے۔ وزیراعظم پارے کہ پاکستان نا جہانی کہول آ کاربن نا پیش تمنگ اٹی بشخ مفننگ نا بریبر ءِ ولے اوکان پد ہم پاکستان موسمیاتی بدلی نا اثرآتیان غٹ آن زیات زہمی ملک آتیٹی اوار ءِ۔ اواومیت ظاہر کرے کہ جہانی برادری بحالی و تعمیر نو نا ریسہ ٹی فعال بشخ ہلنگ نا کمک اٹ نوکاپ نا منفی اثرآتے کم کننگ کن تینا کوشست آتے ترند کیک۔ وزیراعظم نوکاپ آن زہمی تا کمک کن وزیراعظم نا فلڈ ریلیف فنڈ انا ٹہیفنگ تون اوار حکومت نا کنڈآن کروک آ گام گیج آتا ذکر ءِ کرے۔ فلڈ ریلیف فنڈ اٹی ملکی و جہانی ذریعہ اٹ عطیہ جمع کرفنگ مریک۔ پاکستان و یورپی ملک آتا بڑزکو کہول انا رابطہ غاتیا است جمی نا درشانی ءِکرسا وزیراعظم اومیت ظاہر کرے کہ ہڑتوم آ فریق تینا ہڑتوم آ کنڈآتا واپاری و زرکاری رابطہ غاتے پین سوگو کننگ کن  اواری اٹ کاریم کرسا کیرہ تانکہ 2023 آن پد ہم جی ایس پی پلس اسکیم آن فائدہ ہرفنگ مرے۔