کوئٹہ۔ 04 اکتوبر (اے پی پی) الخدمت فاؤنڈیشن بلوچستان نا صدر انجینئر جمیل احمد کرد پارینے کہ نوکاپ آن زہمی ضلع غاتیٹی خیمہ بستی اس جوڑ کرسا زہمی تے آباد کرسا اوفتےتمبو تیٹی زند انا گرج کن و خور تعلیم و جان جوڑی نا گچین آسراتی فراوان کننگ ءِ۔ نصیر آباد جعفرآباد لسبیلہ نوشکی مستونگ کوئٹہ نا خیمہ بستی تیٹی زہمی تا درمان و چناتا تعلیم و خوانفنگ نا ہم گچین بست وبند کننگانے خیمہ بستی تیان پیشن نا زہمی تے ہم راشن و تیار کن و خور فراوان کننگ انگ ءِ ، الخدمت نا منشاکار آک بلوچستان ، پشتونخواہ، سندھ، سویلی پنجاب اٹی 50 ہزار مخلوق ءِ نوکاپی دیر تیان کشسا اوفتے رکھ ہند آتیا سرکرینو 65 ہند آتیا خیمہ بستی جوڑ کرینو و مستی جوڑ کننگ انگ ءِ۔ داخیال آتا درشانی ءِ او نوشکی ٹی نوکاپ زہمی تتون اوڑدہی نا وخت آ تران کرسا کرے ۔ داوخت آ زہمی تیٹی کُننگ نا گڑا ہم بشخنگا ۔ اوپارے کہ نوکاپ زدگان تا کمک اٹی پاکستان تون اوار مچ آ دنیا نا بے شمار ادارہ مملکت آک الخدمت فاؤنڈیشن ءِ والہانہ شرف اس تسنو۔ ایمبولینس، موبائل ہیلتھ یونٹ ناجوڑ بندغ آتیا سرمننگ ءُ ڈاکٹر، پیرامیڈیکل عملہ کشتی تا کمک اٹ ہم سرمننگ اٹی ءُ۔ الخدمت فاؤنڈیشن واٹر فلٹریشن پلانٹ آتا کمک اٹ نوکاپ زدہ علاقہ غاتا الس ءِ کنوئی آ دیر تننگ اٹی ءِ۔ اِرا وخت انا تیار کن و خور فراوان کننگ ءِخذمت انسانیت نا دا مشن برجاسلک۔ پاکستان و پیشن نا ملک آن بروک آ مخلوق ارب آ روپئی نا فنڈ تسنو ولے سیاسی شخصیت و ریئل اسٹیٹ والا شخصیت آتیان نوکاپ زدہ علاقہ غاتسکان ہچ ءُ امداد اس سرمتنے اینو اگہ گچین کاری تا پڑو مرے تو 5 ہزار مخلوق 5 کروڑ آن اسہ ارب روپئی خڑچ کننگ آ تیار مریک وونٹ ءِ ہلسا ہمو مہر و مریبت ملپک ہرااست ءِکٹسا مخلوق نا مہرومریبت اٹی ءِ۔ بلوچستان اٹی نوکاپ و پِر تا بھسکاری، کبینی و نیزگاری نا سوب آن کم کٹیا والا نیزگار الس نا فریشانی مشکل آتیٹی بھاز زیات ودکی مسنے۔
