اقوام متحدہ ۔ 04 اکتوبر (اے پی پی) پاکستان بھارت نا غیرکانودی کوزہ گیری ٹی جموں وکشمیر اٹی کشمیری تیا بھارت نا ظالمانہ جور ءِ بھارت نا ریاستی دہشت گردی نا بدترین درور اس گوندانے و پارینے کہ جہانی انسداد دہشت گردی نا پالیسیک ریاستی دہشت گردی ءِ توننگ اٹ بے سہب مسنو۔ اقوام متحدہ ٹی پاکستان نا آخبتی مندوب منیر اکرم جنرل اسمبلی نا 6 می لیگل کمیٹی ٹی جہانی دہشت گردی نا چٹفنگ کن گام گیج آتیا سیکرٹری جنرل نا رپورٹ آ شرہ ٹی پارے کہ دہشت گردی ءِ ہرجاگہ غا جوان وڑاٹ شکست تننگے۔ اودہشت گردی نا برخلاف پاکستان نا کوشست آتے تالان کرسا پارے کہ پاکستان ریاستی دہشت گردی تون اوار دہشت گردی نا غٹ دروشم تا ترندی اٹ مذمت ءِ کیک۔ اوپارے کہ جہانی انسداد دہشت گردی نا کوشست آک ریاستی دہشت گردی تون مون تننگ اٹ بے سہب مسنو۔ اوپارے کہ بھارت نا غیرکانودی وڑاٹ کوزہ گیری ٹی جموں وکشمیر نا مخلوق ءِ حق خودارادیت تننگ آن انکار کننگ کن ظالمانہ جور ریاستی دہشت گردی نا بدترین ءُ درور اسے۔ پاکستانی مندوب منیر اکرم زور شاغا کہ دہشت گردی نا نئے بیرہ نشانی بلکن بندوی سوب آتے ہم مرکننگ نا گرج ءِ ہرافتے ٹی جموں وکشمیر و فلسطین نا مریس ایسر نا چاری جھیڑہ، درملکی کوزہ و حق خودارادیت آن نمن اوار ءِ۔ اوپارے کہ بھارت 5 اگست 2019 آ اسہ کنڈی و غیرکانودی گام کرسا جموں وکشمیر نا خصوصی حیثیت ءِ چٹفے و دا گام آن پد آن بھارت نا ریاستی دہشت گردی شدت اختیار کرینے۔ اوپارے کہ پاکستان ءِ دہشت گرد و سلامتی کونسل نا پن کروک دہشت گرد ٹولی تا کنڈآن سیم انا ایپار آن جلہو آتیٹی شست کننگک ہرافتا مالی کمکاری و تنظیم ’’دشمن ایجنسی‘‘ تا کمک اٹ کننگک تانکہ دیکی و سویلی پاکستان نا شونداری ءِ زہمی کننگ مرے۔ پاکستانی مندوب منیر اکرم پارے کہ جہانی انسداد دہشت گردی نا کوشست آتیٹی راستیکو دُو انا انتہاپسند ٹولی و انتہاپسندانہ نظریہ غاتا سوب مو ن آ دروک آ دہشت گردی نا چٹفنگ کن گام گیج کننگے دُن کہ تدوک آ سال انسداد دہشت گردی نا جہانی حکمت عملی ٹی امنا کننگاسس۔
