اسلام آباد۔ 04 اکتوبر (اے پی پی) بنجائی وزیر اقتصادی امور سردار ایاز صادق تون پاکستان اٹی چین نا سفیر نونگ رونگ اوڑدہی کرے۔ بنجائی وزیر وزارت آ بننگ آ چین نا سفیر ءِ جم وجوش اٹ بخیرکرے۔ اوڑدہی ٹی تین پہ تینی است خواہی نا امور آ گپ وتران کننگا۔ سردار ایاز صادق ہڑتوم آملک آتا نیام اٹ مریس مدتی خوشگوار تعلقداری تا ستاءِ کرے و پارے کہ پاکستان و چین نا نیام اٹ بے مٹ تعلقداری جوڑ ءِ، نن چین اتون اسہ خاص ءُ رشتہ اس تخنہ ہرادے نن دنیا نا پین قوم اسے تون تخپنہ۔ اونوکاپ نا بھسکاری تیٹی بچفنگ و ریلیف کن چین نا کنڈآن پاکستان ءِ تروک آ امداد نا منت واری ءِ ہرفے۔ چینی سفیر ہڑتوم آملک آتا نیام اٹ برادرانہ تعلقداری تا ستاءِ کرے۔ اوپارے کہ چین نا حکومت پاکستان ءِ ریسکیو و ریلیف اٹی کمک فراوان کننگ اٹ زیات آن زیات بشخ ہلنگ اٹی ءِ۔ اوپارے کہ اکتوبر اسکان نوکاپ نا بابت دمدستی کمکی گڑا دروک آ غٹ کارگو ک کراچی آ سرمریرہ۔ اوپوسکن تفنگ و بحالی نا ریسہ غاتیٹی پین کمک فراوان کننگ نا باوری کرفے۔ داوخت آ گپ وتران کرسا چینی سفیر پاکستان نا میڈیا ٹی چین نا کڑد ءِ مثبت وڑاٹ پیش کننگ نا گرج آ زور شاغا۔ سردار ایاز صادق داہیت انا تائید کرسا پارے کہ ننا الس ءِ پاک چین سنگتی و چین نا کنڈآن پاکستان کن گام گیج آتا بایدے سمامرے۔
