اسلام آباد۔ 04 اکتوبر (اے پی پی) صدر مملکت ڈاکٹر عارف علوی وزیراعظم، وزیر ، پارلیمنٹ نا باسک، گورنرو میڈیا ءِ نوشتہ کروک آ چٹھی تا کمک اٹ سینہ نا کینسر نا بارواٹی آگاہی مہم اٹی اوفتے بشخ ہلنگ نا سلہ خلسا زالبول آتیٹی مہلک مرض انا بابت تینٹ معائنہ و زوت تشخیص نا اہمیت ءِ تالان کننگ اٹ کمکاری نا خواست کرینے۔ صدر اوفتے داسال سینہ نا کینسر نا بابت آگاہی مہم اٹی فعال و منشاکار انہ شریدار مننگ نا سلہ خلک ہراٹی پسماندہ تپہ نا زالبول و نوکاپ زدہ علاقہ غاتیا خاص وڑاٹ چکار کننگک ہراڑے زالبول آک غٹ آن زیات زہمی مسنو۔ صدر مملکت داہیت آ گڑتی نا درشانی ءِ کرے کہ پاکستان اٹی ہرسال سینہ نا کینسر نا کم و ود اسہ لکھ پوسکن ءُ کیس رپورٹ مریک، ہرافتیان نیمہ زالبول تاخیر اٹ تشخیص نا سوب آن مرک انا باٹی کارہ۔ اومستی پارے کہ دا نہادی جان تیان 98 درسد ءِ ازخود معائنہ و زوت تشخیص نا بارواٹی آگاہی ودی کرسا بچفنگ مریک ۔ صدر مملکت پارے کہ خاتون اول بیگم ثمینہ عارف علوی نا کماشی ٹی تدوک آ چار سال انا بریسٹ کینسر آگاہی مہم اٹی ہسپتال آتیٹی سینہ نا کینسر نا کیس آتا بنائی رپورٹنگ اٹی نمان ودکی مسنے۔ پنی آ صحافی تا پن تینا چٹھی تیٹی او تدوک آ چار سال اٹی پدریسہ کمکاری آ اوفتا منت واری ءِ ہرفے و پارے کہ اوفتا قابل قدر کمکاری و فعال شریداری آن بیدس مہم نا سرسہبی ممکن اَلوکہ۔ اومیڈیا پرسن تیا زور شاغا کہ او داسال ہم تینا فعال کڑد ءِ ادا کیر تانکہ ٹارگٹ زالبول آتے نیوز بلیٹن، خصوصی رپورٹ، راگ، مارننگ شو، سرحال، کالم و اداریہ غاتا کمک اٹ ازخود معائنہ و زوت تشخیص نا بنداوی اہمیت نا بارواٹی آگاہی فراوان کننگ مرے۔ صدر زالبول آتے تعلیم تننگ و تینٹ تشخیصی و مرض انا بارواٹی زوت معلوم کننگ نا اہمیت ءِ تالان کننگ نا چرجوئی ٹی داسال اکن چندی سرجزآتا بارواٹی ہم پارے۔ اومستی پارے کہ داسال انا آگاہی مہم پسماندہ تپہ ونوکاپ زدہ علاقہ غاتا زالبول آتا غذائی گرج آتے پورو کننگ نا اہمیت ءِ ہم تالان کیک۔ صدر مملکت دا دود آتے مون آ دننگ کن میڈیا نا اہمیت آ زور شاغا۔ اوداہیت آہم زور شاغا کہ میڈیا زالبول آتے تینٹ معائنہ کن آگاہی و است بڈی کننگ کن اسہ جوان ءُ آگاہی مہم اسے نا بناءِ کے و منشاکارانہ وڑاٹ سینہ نا کینسر نا زوت تشخیص تون اوار جان جوڑی نا بابت ویل آتے کم کننگ کن دراخ جوڑی کن جوان غذا نا اہمیت نا بابت آگاہی ودی کے۔ یات سلے کہ اکتوبر سینہ نا کینسر نا آگاہی نا تُو ءِ، داٹی سینہ نا کینسر نا اثر، اوڑآن بچنگ، زوت تشخیص و درمان نا بارواٹی آگاہی ودی کننگک۔
