اسلام آباد۔ 03 اکتوبر (اے پی پی) بنجائی وزیر سائنس و ٹیکنالوجی آغا حسن بلوچ اسلامیہ یونیورسٹی بہاولپور نا پٹ وپولی ڈٹ آتے قومی است خواہی و اولیت آتا ڈیک گوندانے۔ بنجائی وزیر داخیال آتا درشانی ءِ وائس چانسلر اسلامیہ یونیورسٹی بہاولپور انجینئر پروفیسر ڈاکٹر اطہر محبوب تون دوشنبے نادے آ داڑے اوڑدہی ٹی کرے۔ وزارت سائنس و ٹیکنالوجی نا کنڈآن جاری بیان نا رداٹ دا وخت آ وائس چانسلر بنجائی وزیر ءِ یونیورسٹی ٹی برجا پٹ وپولی سرجز و انفارمیشن ٹیکنالوجی نا ڈٹ و شونداری سرجزآتیان معلومدار کرے۔ اوپارے کہ اسلامیہ یونیورسٹی بہاولپور کرپاس نا ورائٹی و بج آتا تیاری نا بابت جہانی شہرت دوئی کرینے۔ اسلامیہ یونیورسٹی بہاولپور نا کرپاس نا وڑ تے پنجاب نا دسنگ نا چِل درسد آن زیات رقبہ غا دسنگ انگ ءِ، کرپاس نا دا وڑک ملک اٹی ٹیکسٹائل نا صنعت نا بحالی ٹی اہم ءُ کڑد اس تخک، سویابین و مکئی نا انٹرکراپنگ نا ڈٹ چین نا یونیورسٹی نا کمک اٹ برجاءِ، اگہ دا ڈٹ آ عملدرآمد کننگے تو پاکستانی کنوئی آ تیل و پولٹری فیڈ انا درآمد نا مد اٹی ارب آ ڈالر نا زرمبادلہ بچنگ مریک، چولستان نا ہفت ملین ایکڑ رقبہ ءِ پِر اٹی ودکی نا ڈٹ آن پاکستان نا فروٹ باسکٹ اٹ بدل کننگ مریک۔ بنجائی وزیرپارے کہ او دا ڈٹ آتے عملی دروشم اس تننگ کن بنجائی کہول آ گپ وتران کیک۔ وائس چانسلر داوخت آ اوفتے پارے کہ اسلامیہ یونیورسٹی بہاولپور آئی ٹی نا پڑاٹی ہم نمان کاریم کننگ ءِ۔ اسلامیہ یونیورسٹی بہاولپور نا ٹیسٹنگ سروس ریکروٹمنٹ و داخلہ غاتیکن ایلو ادارہ و جامعہ غاتے خذمت فراوان کننگ ءِ۔صوبائی حکومت نا کمک اٹ ای روزگار و ایلو ڈٹ آتا کمک اٹ سد آ آئی پروفیشنل تیار کننگا۔ ہندا وڑ ٹیک پورا نا ڈٹ ہم آئی ٹی نا پڑاٹی بہاولپور کن مزل نا نشان نا حیثیت تخک۔ بنجائی وزیر آغا حسن بلوچ پارے کہ اسلامیہ یونیورسٹی بہاولپور نا دا سرسہبیک بے مٹ ءُ و او زوت یونیورسٹی نا دورہ ءِ کرسا دا ڈٹ آتا مشاہدہ ءِ کیک و استاد و طالب علم آتون اوڑدہی کیک۔
