اسلام آباد۔ 03 اکتوبر (اے پی پی) پاکستان بھارتی وزیرخارجہ نا پیدوار وڑاٹ غیرزموارانہ وبے جا ریمارکس ءِ مسترد کرینے ہراٹی بھارت جہانی دہشت گردی ٹی پاکستان نا اوار مننگ نا دوبہ خلکونے۔ دفترخارجہ نا ترجمان دوشنبے نادے آ داڑے جاری بیان اٹی پارے کہ دا بے بنداو ریمارکس جہانی برادری ءِ گمراہ کننگ کن دہشت گردی نا رداٹ سٹی کسہ گڑنگ نا بھارتی لیڈر آتا گنوکی نا اسہ پوسکن ءُ درشانی اسے ، ہرانا مسخت انسانی حق انا پدریسہ خلاف ورزی و بھارت نا ریاستی دہشت گردی نا سرپرست نا وڑاٹ تینا پہچان ءِ ڈکھنگ نا کوشست اٹی ہمسایہ غاتیا ہور ہرفنگ ءِ۔ ترجمان پارے کہ بھارت نا غیرکانودی کوزہ گیری ٹی جموں وکشمیر آن زیات ریاستی دہشت گردی پین اسہ جاگہ اس ہم اف، ہراڑے 9 لکھ آن زیات کوزہ گیر بھارتی فوج بے گناہ کشمیری تے دہشت گردی، بیدادی ووحشیانہ بیدادی نا شست کننگ ءُ۔ اوپارے کہ دنیا بھارت اٹی مسلمان تا برخلاف بی جے پی۔ آرایس ایس نا انتہاپسند آتا کنڈآن منظم و تالان کروک آ ‘‘دہشت گردی’’ آن ہم بلد ءِ۔ ترجمان پارے کہ انسداد دہشت گردی نا سرسہب کارروائی تیان ہلیس دہشت گردی نا برخلاف جہانی جنگ اٹی ننا کڑد اسکان جہانی امن اٹی پاکستان نا شریداری نا جہانی برادری بھلو کچ اسے آ اعتراف کرینے، پاکستان ہمو اسٹ انگا ملک ءِ ہرا دہشت گردی نا لہر ءِ دشمن زموار و ریاست آتا کنڈآن تورینے۔ دفترخارجہ نا ترجمان مستی پارے کہ بھارت درحقیقت تینا گل زمین و ڈیہہ نا ایلو ملک آتیان پاکستان نا برخلاف دہشت گردی نا مخ تفی ٹی اوار مسنے، بھارت نا دہشت گردی نا گواچی مننگ نا ناپاک مہم و پاکستان آ منافقانہ وڑاٹ دوبہ خلنگ نا مسخت جہانی برادری ءِ درو تننگ نا کوشست کننگ ءِ۔ ترجمان پارے کہ بھارتی جاسوس کلبھوشن یادیو بھارتی بحریہ نا اسہ حاضر سروس آفیسر و راانا آپریٹیو پاکستان اٹی دہشت گردی نا کارروائی تا ڈٹ بندی، مخ تفی ، اوفتے مون آ دننگ وانجام تننگ اٹ اوار مسنے، ہرا دہشت گردی نا ریاستی اسپانسر نا بھارت نا حقی دروشم نا پیدوار یات دہانی ءِ۔ ترجمان تینا بیان اٹی پاکستان نا داخواست ءِ دُوارہ پارے کہ جہانی برادری بھارت ءِ دہشت گرد تنظیم تا سرپرستی و پڑوسی ملک آتیٹی بدامنی تالان کننگ کن جوابدہ گوندے۔ ترجمان بھارت ءِ مشورہ تس کہ او پاکستان آبے بنداو دوبہ خلنگ نا جاگہ غا بھارت نا غیر کانودی کوزہ گیری ٹی جموں و کشمیر و بھارت اٹی مسلمان تا برخلاف ریاستی دہشت گردی نا تینا پالیسی ءِ ترک کے و کشمیری الس ءِ اقوام متحدہ نا سلامتی کونسل نا قرارداد و اوفتا است خواہی نا رداٹ تینا حق خودارادیت نا کاریم اٹ اتنگ نا موکل ایتے۔
