اسلام آباد۔ 03 اکتوبر (اے پی پی) اسپیکر قومی اسمبلی راجہ پرویز اشرف تون دوشنبے نادے آجرمنی و ناروے نا سفیر آک پارلیمنٹ ہاؤس اٹی جتا جتا اوڑدہی کریر۔ اوڑدہی تیٹی ہڑتوم آ کنڈآتا تعلقداری تون اوار تین پہ تینی است خواہی نا ایلو امور آ گپ وتران کننگا۔ اسپیکر جرمنی نا سفیر تون گپ وتران کرسا پارے کہ پاکستان و جرمنی نا تعلقداری اسیجائی جمہوری قدر و کثیر الجہتی کمکاری آ مبنی ءُ۔ اوپارے کہ پارلیمانی سفارتکاری و قومی اسمبلی و جرمن پارلیمنٹ نا نیام اٹ کمکاری ساڑی آ تعلقداری تے پین سوگو جوڑ کننگ اٹ اہم ءُ کڑد اس ادا کننگ کیک۔ اسپیکر قومی اسمبلی پاکستان اٹی موسمیاتی بدلی نا تباہ کن اثرآتے مون آ تخسا ریمارکس تس کہ ساڑی آ نوکاپ آن ملک انا اسہ تہائی بشخ اس ڈبنگانے و 33 ملین آن زیات پاکستانی بے اُرا مسنو۔ موسمیاتی بدلی آن ودی مروک آ حالیت آتون مون تننگ کن پاکستان نا قومی اسمبلی روانڈا ٹی مروک آ بین الپارلیمانی یونین (آئی پی یو) کانفرنس اٹی اسہ ہلہلہ ئی قرارداد اس پیش کرینے ہراٹی دنیا نا پدتموک ملک آتے پاکستان کون آ پدتموک ملک آتیٹی موسمیاتی تنکی آن مروک آ ناقابل تلافی نسخان تا پوروی کن ایمرجنسی ایجنڈا آئٹم اس پیش کننگک۔ پاکستان اٹی جرمنی نا سفیر مسٹر برن ہارڈ شیلاگیک نوکاپ زہمی تتون تینا یکجہتی نا درشانی ءِ کرے و موسمیاتی تنکی تون مون تننگ کن آئی پی یو نا کمک اٹ جہانی فنڈ اکن قومی اسمبلی نا خواست نا مخ تفی نا باوری کرفے۔ اوکان پد اسپیکر قومی اسمبلی راجہ پرویز اشرف تون پاکستان اٹی ناروے نا سفیر مسٹر پرالبرٹ الاساس ہم اوڑدہی کرے۔ ہڑتوم آ کنڈآتا کمکاری ، اقتصادی تعلقداری و ملک اٹی ساڑی آ نوکاپ نا حالیت آتا بابت چندی امور آ گپ وتران کننگا۔ اسپیکر پارے کہ پاکستان ناروے ءِ تینا وفادار سنگت و اقتصادی شریدار تکک و تینا ساڑی ہڑتوم آ کنڈآتا تعلقداری ءِ پین سوگو کننگ نا خواہندار ءِ۔ اوپارلیمنٹ نا باسک آتا آزموندہ غاتیٹی ودکی کن پارلیمانی سفارتکاری نا گرج آ زور شاغسا پارے کہ پارلیمانی ڈل آتا ہن و بر آن ہڑتوم آ ملک آتا پارلیمان و پارلیمنٹ نا باسک آتا نیام اٹ کمکاری و رابطہ غاتے ودفنگ اٹ کمکار مریک اومستی پارے کہ پاکستان نا قومی اسمبلی نوکاپ آن زہمی بندغ آتا ڈکھیائی تا مداوا کننگ کن روانڈا ٹی مروک آ 145 می آئی پی یو کانفرنس نا ایجنڈا ٹی اسہ ہلہلہ ئی ایجنڈا آئیم ءِ اوار کننگ نا سلاہ پیش کرینے ہرانا مسخت پاکستان نا نوکاپ آن زہمی الس نا حالیت زار ءِ تالان کننگ ءِ۔ اسپیکر کانفرنس نا ہلہلہ ئی ایجنڈاٹی نوکاپ نا تنکی ءِ پورو کننگ کن پاکستان نا خواست آ ناروے آن کمک طب کرے۔ ناروے نا سفیر پاکستان اٹی ساڑی آ نوکاپ اٹی مروک آ بے پناہ نسخان تیا است ہسونی نا درشانی ءِ کرے۔ اونوکاپ زہمی تا بحالی نا کوشست آتیکن تینا کمکاری نا باوری کرفے۔ اوموسمیاتی بدلی تا سوب آن مروک آ بھسکاری تون مون تننگ کن آئی پی یو نا کمک اٹ جہانی فنڈ انا ٹہیفنگ کن قومی اسمبلی آف پاکستان نا کنڈآن پیش کروک ایمرجنسی ایجنڈا آئٹم نا تینا ملک انا کنڈآن پورو مخ تفی نا باوری کرفے۔
