اسلام آباد۔ 03 اکتوبر (اے پی پی) سی پیک نا ارٹ میکو ریسہ پاکستان اٹی روزگار اٹی ودکی و جم قومی پیدوار (جی ڈی پی) نا نمو ٹی اہم ءُ کڑد اس ادا کیک، پاک چین صنعتی کمکاری ملک ءِ ڈیہہ ٹی پیدواری ہند اس جوڑ کیک، صنعتی زون تا جوڑ کننگ آن ہندی صنعت کار آتیکن زرکاری نا بے شمار وارخواہی ودی مریک زرکاری بورڈ انا کمامدارآتا رداٹ چینی صنعت آتا پاکستان اٹی گدریفنگ آن بے روزگاری نا چٹفنگ، چندی بشخ آتیٹی معلومداری نا ہل و تس و چاہنداری ٹی ودکی مریک۔ اوپارے کہ سی پیک نا داسہ ارٹ میکو ریسہ بناکرینے، دا ریسہ ٹی صنعتی کمکاری و کشت وکشار نا مون آ دننگ نا ڈٹ آتا سوب آن اولیکو ریسہ آن ہم زیات گیشتر و نمان اثر تمک۔ اوفتا پاننگ ئس کہ زند انا ہر بشخ وڑانا وڑ اسے ٹی سی پیک تون گنڈوک ءِ، ہنداخاطرآن اگہ پاننگے کہ سی پیک غٹ اکن تو دا ڈٹ انا وژن نا گچین عکاسی مننگ کیک۔ کمامدارآک پاریر کہ دا اسہ خالص شونداری ڈٹ اسے ہرا نئے بیرہ چین و پاکستان بلکن مچ آ ڈیہہ کن شونداری وشونہالی نا ضامن ءِ ، ہنداخاطرآن پاکستان و چین ہڑتوم آ ک ہی سی پیک نا غٹ ڈٹ آتے وخت آ پورو کننگ نا عزم تخرہ۔ اوپارے کہ سی پیک نا رداٹ درملکی زرکارآتے زیات آن زیات آسراتی تننگک، فیصل آباد اٹی علامہ اقبال خصوصی اقتصادی زون و رشکئی خصوصی اقتصادی زون آ کاریم جوانی اٹ برجاءِ و بھلو کچ اسے ٹی زرکارآک دا اقتصادی زون تیٹی زرخلنگ اٹ است خواہی ظاہر کرینو، پاکستان سی پیک نا ارٹ میکو ریسہ ٹی صنعتی و کشاری شونداری و گچین سٹرک رابطہ غاتا سوب آن فائدہ ہرفنگ نا بناءِ کیک۔ کمامدار آک پاریر کہ حکومتی سازگار پالیسی تا کمک اٹ زرکارآتے غٹ ممکنہ آسراتی فراوان مننگ ءِ، اسہ ڈیہہ اسہ شاہراہ ڈٹ ساڑی صدی نا تقدیر ءِ بدل کیک ہراٹی سی پیک اہم ءُ ڈٹ اسے۔ اوپارے کہ ہڑتوم آ ملک سی پیک نا اسیجائی کمکاری کمیٹی نا دہ می دیوان نا تیاری ءِ کننگ ءُ، بروک آ ریسہ ٹی ہڑتوم آ ملک آک گوادر پورٹ ءِ شونداری تننگ، انڈسٹریل پارکس، کشت وکشار و سائنس و ٹیکنالوجی پین پین کن گام گیج آتیا چکار کیک۔
