واشنگٹن۔ 03 اکتوبر (اے پی پی) امریکہ ٹی پاکستان نا سفیر مسعود خان پارینے کہ پاکستان تون اوار ایلو پدتموک ملک آتے موسمیاتی بدلی نا اثر آتون مون تننگ نا قابل جوڑ کننگ کن مریس مدتی امریکی عزم انا گرج ءِ۔ پاکستانی سفارت خانہ نا کنڈآن جاری پریس ریلیز نا رداٹ اوپاکستان و امریکہ نا سفارتی تعلقداری تا جوڑ مننگ نا 75 سال انا خوشی تیٹی پاکستانی امریکی پریس ایسوسی ایشن نا دود اٹی تران کرسا پارے کہ پاکستان اٹی تباہ کن نوکاپ و فلوریڈا و کیبی امریکی ریاست آتیٹی سمندری طوفان ایان نا سوب آن مروک آ ساڑی آ بھسکاری پیدوار وڑاٹ داہیت انا ڈیک ءِ کہ اسہ ملک اس ہم موسمیاتی بدلی تا رجحان آن رکھ اف و داکان مست کہ ہرے مرے ننے غٹ ءِ زوت یکجا مرسا چاگڑدی بدلی نا تنکی تون مون تننگ نا گرج ءِ۔ دادود اٹی پاکستانی و امریکی صحافی، امریکی محکمہ خارجہ نا عہدیدار، امریکہ ٹی رہینگوک پاکستان نا اہم شخصیت آک بشخ ہلکر۔ پاکستانی سفیر مسعود خان پاکستان اٹی نوکاپ آن مروک آ بھسکاری تے مون آ تخسا پارے کہ چاگڑدی بدلی قدرتی، اقتصادی، زرگزرانی و راجی نظام ءِ زہمی کننگ ءِ۔ نوکاپ نا سوب آن اسہ کروڑ 60 لکھ چناتتون اوار 3 کروڑ 30 لکھ بندغ بے اُرا و ملک انا رقبہ نا اسہ تہائی بشخ اس دیر اٹی ڈبنگا۔ اونوکاپ نا سوب آن زہمی علاقہ غاتیٹی ودی مروک آ ناجوڑی تا بابت پارے کہ دا بھسکاری نا تہہ ٹی اسہ پین بھسکاری اسے۔ پاکستانی سفیر امریکی حکومت ، کانگریس ، نجی بشخ، سخی و ایلو بندغ آتا منت واری ءِ ہرفے ہرافک پاکستان نا نوکاپ زہمی تتون یکجہتی نا درشانی ءِ کرسا انفرادی وڑاٹ کمک کریر۔
