لاہور۔3اکتوبر (اے پی پی): چیف جسٹس لاہور مزن آمیس گس ءِ سروکی ءَ سئے باسکی بینچ ءَ مسلم لیگ (ن) ءِ بنجاہی نائب صدر مریم نواز ءِ پاسپورت واتری ءِ ھاترءَ جم کتگیں دزبندی من اِت، آمید گس ءَ مریم نواز ءِ پاسپورٹ واترکنگءِ حکم داتگ۔ چیف جسٹس لاہور آمید گس محمد امیر بھٹی ءِ سروکی ءَ جسٹس علی باقر نجفی ء ُجسٹس طارق سلیم شیخ ءِ سرءَ بوتگیں سئے باسکی بینچ ءَ مسلم لیگ ن ءِ بنجاہی نائب صدر مریم نواز ءِ دزبندی گوشداشتگ۔ گوستگیں گوشدارگ ءِ وہدءَ آمیدگسی حکم ءِپد نیب حکام ءَ دو تاکانی لُکیں پسو جم کتگء ُ شرپ مندیں بینچ ءَ را سرپد کتگ کہ بیب ءَ را مریم نواز ءِ پاسپورٹ ءِ پکار نیستء ُ نہ دگہ مارا آمید گسی حکم ءِپد ءَ پاسپورٹ واتر کنگءِ سرءَ اعتراض اِنت۔ دوشمبے ءِ روچءَ مریم نواز ءِ وکیل امجد پرویز آمید گس ءَ پیش بوتگ ء ُ گوستگیں پیشی ءَ پیش نابوہگءِ پہلی لوٹ اِتگ کہ آ آمید گس ءَ من اِتگ۔ آمید گس ءَ نیب حکامءِ نیمگ ءَ چہ پسو دیئگ ءَ پد مریم نواز ءِ دزبندی من اِتگ ء ُ رجسٹرار کارگس ءَ را پارسپورٹ واتر کنگءِ حکم داتگ۔ بینچ ءِ دیما اے گپ کنگ بوتگ کہ چوہدری شوگرمل ءِ انکوائری 2018 ءَ بندات بوتگ ء ُ پدا نیب ءَ مریم نواز ءَ را دزگیر کتگ۔ مزن آمید گس ءَ مریم نواز ءِ دزگیر بوہگءِ پد ءِ ضمانت منظور کوتگ ءُ آمید گسی حکم ءِ سرءَ ہفت کروڑ کلدار جم کتگ ء ُ پاسپورٹ رجسٹرار کارگس ءَ جم کتگ۔ چارسالاں چہ چوہدری شوگر مل ءِ ریفرنس جم نابوتگ۔ مریم نواز ءِ ٹریک ریکارڈ درستانی دیما اِنت آ پیسر ءَ ہم ڈنی ملک ءَ چہ واتر ملک ءَ اَتکگ، چارسال پد مریم نواز آمید گس ءِ دروازگءَ اَتکگ۔ دزبندی ءِ تہا گشگ بوتگ کہ کس ءَ بنکی آئینی حکاں چہ زھبار کنگ نابیت۔ دزبندی کنوک مریم نواز ناتتکگ، آئی ءَ وتی ماتءَ را سکراتءَ یل کتگء ُ پاکستان ءَ واتر بوتگ۔ نیب کانود ءَ ملزم ءِ ڈنی ملک رؤگءَ ایچ وڑیں بندش ناجتگ۔ مریم نواز ءِ نیمگءَ چہ دزبندی ءِ تہا گشگ بوتگ کہ 7 کروڑ کلدار ہم سکیورٹی ءِ ھاترءَ جم کتگ اَنت، چوہدری شوگر ملز کیس ءِ تہامیرٹ ءِ سرءَ ضمانت رستگ۔ ڈپٹی رجسٹرار جوڈیشل ءَ را پاسپورٹ واترکنگءِ حکم دیئگ بہ بیت۔ آمید گسی کاروائی ءَچہ پد میڈیا ءَ گوں گپ ء ُتران کتگء ُ مریم نواز ءِ وکیل امجد پرویز ءَ گشتگ کہ آمید گسءَ مریم نواز ءِ دزبندی اے کیس ءِتہا منظور کتگ، کہ آئیءِ تہا یکیں روچے ءِ ور نٹ کشگء ُ دزگیر کنگ بوتگ، اے کیس ءِتہا مریم نواز ءِ دزگیری بندی جاہ آئی ءِ دیما کنگ بوتگ۔ امجد پرویز ءَ گشتگ کہ مریم نواز ءِحلاپ ءَ اے کیس ءِ تہا تاں مرچی ٹرائل ءِ تہا ایچ وڑیں کاروائی نابوتگ اگاںمرچی تحریری حکم نامہ بہ رسیت گڑا مریم نواز مرچی کیئت ء ُ وتی پاسپورٹءَ دست گیپت۔
