اسلام آباد۔30ستمبر (اے پی پی): مزن وزیر محمد شہبا ز شریف ءَ گشتگ کہ آڈیو لیکس ءَ عمران خان نیازی ءِ دروگیں بیان ءُ انوگیں حکومت ءِ حلاپ ءَ پندل سازگ ءَ را سُہرا کتگ، راج اے پندلاں سرپد بوتگ، ما ریاست ءَ را رکینگ ءِ ھاترءَ وتی سیاست ءَ را ندر کتگ، ملک ءَ را چہ نقصان رکینتگ، اُلس راستء ُ دروگ، ازمت ء ُ فراڈ، ریا ءُ روح ء ُ راستی ءِ تہا تپاوت بہ کنت، اُلس مدام راستیں فیصلہ کنت۔ جمعہ ءِ روچءَ بھارہ کہو بائی پاس منصوبہ ءِ بُن اِشت ایر کنگی مراگش ءَ گوں تران کتگء ُ مزن وزیر ءَ گشتگ کہ اے یک مزنیں اُلسی منصوبگ اِت کہ ایشی ءَ را ساپ ءُ سلائیں بولی ءِ ردءَ این ایل سی ءَ را دیئگ بوتگ، منصوبہ ءَ را چار ماہ آں سرجم کنگ ءِ منء ُ گر بوتگ ، بلے این ایل سی حکام گشیت کہ ا ے سئے ماہ آنی تہا سرجم کنگ بیت، مسلم لیگ(ن) ءِ حکومت ءِ یکے نا بازیں انچیں درور اَنت کہ اے وڑیں منصوبگ ڈیڈھ ء ُ دو ماہ آنی تہا سرجم بوتگ اَنت اگاں اے منصوبہ آنی سرءَ حرچہ آنی تہا کمی بوت کنت گڑا ایشی ءِ ھاترءَ ہم کوشست کنگ بہ بیت۔ مزن وزیر ءَ گشتگ کہ جاڑیں شہر ءِ ہوالگءَ ایندگہ منصوبہ ہم جاری اَنت، ایشی ءِ تہا اینٹی گریٹڈ ٹرانسپورٹ ءِ منصوبہ ہم ہوار اِنت کہ ایشی ءِ وسیلگ ءَ اسلام آباد ءِ بازیں سیکٹرز آنی مسافر آناں اربن ٹرانسپورٹ نظام ءَ گوں بندوک کنگ بیت۔ مزن وزیر ءَ گشتگ کہ اے گپ باز اپسوز ناک اِنت کہ نواز شریف دور ءَ بنداست بوتگیں اُلسی پلاح ء ُ گہبود ءِ منصوبہ آناں پیسرگیں حکومت ءَ 4 سالانی تہا مھتل کتگ، اے چاریں سالانی تہا کس ءَ را پبلک ٹرانسپورٹ ءِ حیال نابوتگ، میٹروبس ءِ منصوبہ ءَ را ہم مھتل کنگ بوتگ ہما کہ نیوایئرپورٹ ءَ برگی بوتگ اے منصوبہ آنی سرءَ ارباں کلدار حرچ کنگ بوتگ ، مئے حکومت ءَ آیگ ءَ گوں اے منصوبہ آناں او لی دلگوشی سرجم کتگ، ہمے وڑءَ اورنج ء ُ بلیولائن منصوبگ سرجم بوتگ اَنت کہ ایشاں چہ اُلسءِ جیڑہ آنی تہا کمی اَتکگ۔ مزن وزیرءَ گشتگ کہ من 40 سال وتی مستریں برات ءِ سروکی ءَ سیاستءِ تہا گوازینتگ اَنت، ہرچ وڑیں جہلگء ُ بُرزگ دسیتگ، مارشل لاءِ دور ہم دیستگ، وتی سیاسی نامنوکانی حکومت ہم دیستگ بلے وتی سرجمیں زندءَ اے وڑیں غیر زمہ وار ء ُ دروگیں مردم کدی ہم نادیستگ۔ پیسرگیں مزن وزیر ءَ بے شک ورلڈ کپ کٹ اِتگ ء ُ نادراہ جاہ جوڑ کتگ ء ُ اے ٹیم وک ءِ نتیجگ بوتگ، ایشیءِ کریڈٹ کپٹن ءَ را روت، تو نادراہ جاہ جوڑ کتگ جوانیں گپ اِت، بلے کس ءَ ر ا دور دورءَ اے گمان نابوتگ کہ ورلڈ کپ باج بروک ء ُ نادراہ جاہ جوڑ کنگ سیاستءِ پِڑءَ ہُشکیں دروگے بیت ء ُ راج ءَ را دھوکہ دنت۔ مزن وزیر ءَ گشتگ کہ شنگھائی کمک تنظیم ءِ دیوان ءَ سرجمیں دنیاءِ سروکاں گوں آئی ءِ گند ء ُ نندبوتگ، اے سروکانی تہا ہما مردم ہم ہوار اَنت کہ آیانی درور عمران خانءَ وتی گوشتانکانی تہا دنت، مئے گوں آیانی جوانیں گپ ء ُتران بوتگ ، آیاں وت گشتگ کہ ماشمارا کشتءُ کشاری پڑءَ کمک کنگ لوٹاں، اے سروکاں پٹرولیم ء ُ گیس پائپ لائن ءِ منصوبہ آں ہم کمک ءِ گپ ءُ تران ہم بوتگ، ایشی ءَ پد اقوام متحدہ ءِ جنرل اسمبلی ءِ دیوان ءِ موہ ءَ ہم مئے گندء ُنند بوتگ اَنت۔ مزن وزیر ءَ گشتگ کہ اُلس سرپد اِنت کہ پندلی کسّہ آنی تہا جان مان نیست، نوں آڈیو لیکس ءَ اے گپ ءِ سرءَ مہر جتگ کہ اے دنیاءِ دروگ بند تریں مردم اِنت۔ مزن وزیر ءَ گشتگ کہ ما درست کتاہ کاریں مردم اَنت ءُ ہر وہدءَ چہ اللہ ءَ پہلی ء ِ لوٹوک اَنت بلے راج ءِ حلاپ ءَ انچیں پندل سا زگ بوتگ کہ راج دپترءِ تہا ایشی ءِ ایچ وڑیں درور نیست۔ مزن وزیر ءَ گشتگ کہ دروگیں ووٹاں چہ مزن وزیر جوڑ بوہگءَ پد راج ءِ جاورھال شر بہ کتیں، نیزگاری ہلاس کتیں، یک کروڑ لوگ ء ُ 50 لکھ نوکری بہ داتیں بلے یک اِشتے ہم کسءَ را ناداتگءُ مردمانی نوکری پچ گرگ بوتگ اَنت، راج ءَ را گران بہائی ءِ توپان دیئگ بوتگ۔ ما حکومت ءِ زمہ واری زُرتگءُ یک مزنیں گرانیں سِنگے چست کتگ، عمران خانءِ اے کوشست بوتگ کہ آ پاکستان ءَ را نقصان بہ دنت۔ ما ملکءُ معیشت ءَ را اے گرانیں جاورھالاں چہ کشاں، منی ایمان اِنت کہ اگاں ما محنت بہ کناں گڑا اللہ مارا ایشی ءِ اجرءَ الم ءَ دنت اگاں دوبئی ریک ءِ تہا دیم روئی کت کنت گڑاپاکستان ءِ تہا ہم ایچ چیزءِ کمی نیست، مئے گورءَ کوہ، زِر، دریا ء ُ مزنیں مردم اَست اَنت کہ آیانی تہا ڈاکٹر، انجیبئر، سائنسدانء ُ زندءِ ایندگہ تک ء ُ پھناتاں گوں بندوکیں زانت کارء ُ کواس ہوار اَنت، ما ایٹمی طاقت اَنت۔ محمد شہباز شریف ءَ گشتگ کہ گوستگیں سے ماہ آنی تہا پاکستان آ پ ءِ تہا بُہک اِتگ ، سندھ ءِ جہلی دمگ، بلوچستان،جنوبی پنجاپ ء ُ خیبر پختونخوا ءَ ہارءَچہ بازیں نقصانے بوتگ، گوستیگں دو ماہاں عمران خان جلسہ آنی تہا بہتان جنگءَ اِنت، اے جلسہ آنی سرءَ کروڑاں کلدار ھرچ بوہگءَ اَنت۔ آئی ءَ گشتگ کہ پیسرگیں مزن وزیر ءَ لاہور ءَ پی کے ایل آئی ءِ جوانیں منصوبگ برباد کتگ کہ ایشی ءِ تہا گُہٹگ ء ُ جگر ءِ مان دیئگ ءِ آسراتی سرکنگی بوتگ، اے منصوبہ ءَ را عمران خان ءَ پیسرگیں چیف جسٹس ءِ گوما یکجاہ ہوار بوتگ ء ُ برباد کتگ، راج ءِ زر زوال کنگ بوتگ اَنت۔ مراگش ءَ تہی کارانی وزیر رانا ثنااللہ، مزن وزیرءِ حاسیں کمک کار طارق فاطمی، طارق فضل چوہدری، انجم عقیل ، زہرہ ودود فاطمہ ءُ ایندگہ مردم ہوار بوتگ اَنت۔ ایشی ءَ پیسر چیئرمین سی ڈی کپٹن(ر) عثمان ءَ مراگش ءَ گوں تران کتگء ُ مزن وزیر ء ُ آیوکیں مہمان آناں وش اَتک کتگ ء ُ گشتگ کہ مرچی راج دپتری روچ اِت، اے منصوبگ ءَ چہ جاڑیں شہر ء ُ سرجمیں پاکستان ءَ چہ آیوکیں مردمانی دیریگیں جیڑہ ء ُ جنجال ءَ را گیشءُ گیوار بوہگءَ کمک رسیت۔ آئی ءَ گشتگ کہ لھتیں ماہ آں پیسر راول ڈیم چوک ءِ بُنگیج ءِ موہ ءَ مزن وزیر ءَ بھارہ کہو بائی پاس منصوبہ ءِ بُنگیج کنگءِ پنتء ُ شون کتگ۔ مزن وزیر ءِ پنتء ُ شون ءِ سرءَ سی ڈی اے ءَ کاروائی سرجم کتگء ُ اے منصوبہ بندات کتگ، اے منصوبگ این ایل سی ءِ ہوالگ کنگ بوتگ کہ چارماہ آنی تہا سرجم بیت، منصوبگءِ ردءَ 5.4کلومیٹر بائی پاس جوڑ کنگ بیت کہ ایشی ءِ تہا یک انٹرچینج، یک فلائی اوور ء ُ 4 انڈر پاس ہوار بنت۔ آئی ءَ گشتگ کہ مزن وزیر ءَ مھتلی ءِ آماچیں ایندگہ منصوبہ کہ آیانی تہا اسلام آباد ایکسپریس وے، مارگلہ ہائی وے، سیونتھ ایونیو، ریلوے پل سہالہ ء ُ نیلورہائیٹس ہوار اَنت ایشانا ہم زوتاں چہ زوت سرجم کنگءِ پنتء ُ شون کتگ۔
