اسلام آباد۔ 30 ستمبر (اے پی پی) ایشیائی شونداری بینک پاکستان اٹی نوکاپ آن زہمی علاقہ غاتیٹی امداد و پائیدار بنداوی پنجر نا تفنگ نا سرجزآتیٹی کمک کن 2 ارب ڈالر آن زیات نا کمکاری نا منظوری ءِ ایتک۔ داہیت ءِ ایشیائی شونداری بینک انا ڈائریکٹر جنرل نیامی و دیکی ایشیا یوجین ژوکوف منیلا ٹی ورچوئل پریس کانفرنس اٹی پارے۔ اوپاکستان اٹی ساڑی آ نوکاپ و طوفانی پِر تا سوب آن مروک آ جانی و مالی نسخان آ ہمدردی و غم انا درشانی ءِ کرے و پارے کہ بینک مہالو آن خور انا فراوانی و تمبو تا دمدستی ہلنگ کن 30 لکھ ڈالر نا گرانٹ تسنے۔ اوپارے کہ بھاز المی دمدستی امداد، زہمی علاقہ غاتا بحالی و پوسکن تفنگ کن 500 آن ہلیس 700ملین ڈالر اسکان نا پیکج ہم تننگ انگ ءِ ہرانا منظوری اینخو سال انا ایسر اٹی تننگک۔ اوپارے کہ ایشیائی شونداری بینک پاکستان اٹی زرگزرانی وڑاٹ نزور تپہ غاتیا خور انا ودوک آ نہاد و ایلو جہانی جھٹکہ غاتا اثر آتے کم کننگ کن پین 1.5 ارب ڈالر نا کاؤنٹر سائیکلیکل سپورٹ آ کارروائی کننگ ءِ۔ پاکستان اٹی نوکاپ آن پد انا امداد و گام گیج آتا بابت اسہ سوج اسے نا ورندی ٹی اوپارے کہ نن ہندی حکومت و ایلو جہانی شونداری شریدار آتا خڑکی کمکاری اٹ کاریم کننگ اُن تانکہ نسخان تا گرج آتا کساس ءِ گڈیکو دروشم اس تننگ مرے ہراکہ ممکنہ وڑاٹ بروک آ تُو انا نیام اسکان پورو مریک۔ اوپارے کہ موسمیاتی بدلی تا سوب آن آفت آتا شدت اٹی ودکی مننگ ءِ، پاکستان اٹی ساڑی آ نوکاپ موسمیاتی بدلی تا بھرم ءِ، دا نوکاپ آن 33 ملین مخلوق زہمی مسنے ہرافتیان 6 لکھ انا خڑک کمکی کیمپ آتیٹی ءُ ، نوکاپ آن 1.7 ملین اُراتے نسخان رسینگانے۔
