کراچی۔ 30 ستمبر (اے پی پی) پاک فضائیہ نا کنڈآن خیبرپختونخوا، سندھ ، بلوچستان و سویلی پنجاب نا نوکاپ آن زہمی علاقہ غاتیٹی طبی امداد، ریلیف و بحالی نا سرجز آک پبی وڑاٹ برجاءُ۔ پاک فضائیہ نا کنڈآن جاری اعلامیہ نا رداٹ پاک فضائیہ تینا میڈیکل کیمپ و موبائل میڈیکل ٹیم تا کمک اٹ نوکاپ زدگان تے المی طبی امداد فراوان کننگ ءِ۔ پاک فضائیہ نا میڈیکل لیب کلیکشن پوائنٹ ہم نوکاپ زہمی تیٹی دیر آن ودی مروک آ ناجوڑآتا تشخیص اٹی لگوک ءِ۔ پاک فضائیہ نا کارندہ غاک ٹرانسپورٹ، فلیٹ، ہیلی کیپٹر و کشتی تا کمک اٹ نوکاپ زدہ علاقہ غاتیٹی اختہ ہندی مخلوق نا کشنگ اٹ کمک کریر و اوفتے رکھوک ہند آتیا گدریفیر۔ پاک فضائیہ نا کارندہ غاک نوکاپ آن زہمی مخلوق اٹی خشک راشن ، تیار کن و خور، کنوئی ءُ ساف دیر و ایلو کنوئی آ گڑاتے بشخار۔ تدوک آ 24 گھنٹہ ٹی پاک فضائیہ ضرورت مند خاہوت آتیٹی 18 ہزار 20 تیار کن و خور نا پیکٹ، 340 دیر انا بوتل و 560 خشک راشن نا پیکٹ بشخا۔ پین داکہ مفت خور و ہنکین نا فراوانی آن بیدس پاک فضائیہ نا میڈیکل ٹیمک 878 ناجوڑ آتا مفت طبی معائنہ ءِ ہم کریر۔
