چین نا ننگ ژیاہوئی حکومت نا پاکستان نا نوکاپ آن زہمی تیکن 1.75 ملین رینمنبی امداد نا پڑو

بیجنگ۔ 30 ستمبر (اے پی پی) چین نا وتواجہ علاقہ ننگ جاہوئی نا حکومت پاکستان نا نوکاپ آن زہمی تیکن 1.75 ملین رینمنبی (آر ایم بی) مالیت نا تمبو و کمبل آتیا تالان امداد نا  پڑو کرینے۔ چین اٹی پاکستان نا سفیر معین الحق ننگ جاہوئی حکومت نا کنڈآن پاکستان حکومت نا نوکاپ آن زہمی تا ریلیف و بحالی نا کوشست آتیٹی کمک کن امداد نا پڑو نا ستاءِ کرینے۔ دا چرجوئی ٹی کمکی گڑاتا باضابطہ لانچنگ دود بذریعہ ویڈیو لنک اڈ ہلک ہراٹی چین نا تعلقدار عہدیدار، پاکستانی سفیر معین الحق و سفارت خانہ نا ایلو عہدیدار آک بشخ ہلکر۔ داوخت آ سٹیڈنگ کمیٹی نا باسک و سی پی سی ننگ ژیا کمیٹی نا سیکرٹری جنرل لی ڈونگ شینگ سیلان نا سوب آن زوال کروک آتا خاہوت آتون ہڑزخواہی نا درشانی ءِ کرسا پاریر کہ چین سدا بہار سٹریٹجک کوآپریٹیو پارٹنر و آئرن برادر نا حیثیت اٹ دا مشکل وخت اٹی پاکستانی الس تون سلوک ءِ۔ اونوکاپ زہمی تا زوت بحالی کن نیک است خواہی نا درشانی ءِ کرسا ننگ ژیا ہوئی وتواجہ علاقہ نا حکومت نا پاکستان تون تعلقداری تے پین سوگو کننگ ناعزم انا درشانی ءِ کریر۔ داوخت آ پاکستانی سفیر معین الحق ننگ ژیاہوئی حکومت نا کنڈآن پاکستان حکومت نا نوکاپ زہمی تا ریلیف و بحالی نا کوشست آتیٹی کمک کن دمدستی امداد نا سلہ نا ستا ءِ کرے و داہیتءِ دُوارہ پارے کہ ہڑتوم آ ملک آک مستین اٹی مدام مشکل وخت اٹی اسہ ایلو تون تفینو۔ چیف سیکرٹری پنجاب ننگ ژیا ہوئی حکومت نا کنڈآن پاکستان نا نوکاپ زہمی تا امداد آ منت واری ءِ ہرفے۔