نوکاپ زدگان آتے کن 133 جہاز کمکی گڑا اتسا پاکستان آ سرمسنو، دفترخارجہ

اسلام آباد۔ 30 ستمبر (اے پی پی) نوکاپ زہمی تیکن پیشن نا ملک آن کمکی جہازآتا بننگ نا چرجوئی برجاءِ، داتم اسکان چندی ملک آتیان 133 جہاز زہمی تیکن کمکی گڑا اتسا پاکستان  آ سرمسنو۔ دفترخارجہ نا ترجمان نا کنڈآن جاری حساب و کتاب نا رداٹ نوکاپ زدگان تیکن متحدہ عرب امارات آن داتم اسکان جم وڑاٹ 41، ترکیہ غان 14، چین آن 4، ازبکستان آن اسٹ، قطر آن 4، فرانس آن اسٹ، یونیسیف نا 3، اقوام متحدہ نا پناہ گزین تا ادارہ (یو این ایچ سی آر) نا 14 جہاز، ترکمانستان نا اسٹ، اردن نا اسٹ، جہانی ادارہ خور انا مسٹ، امریکہ نا 21، برطانیہ نا اسٹ، نیپال نا اسٹ، اومان نا 8، روس، یونان و اٹلی نا اسٹ اسٹ و سعودی عرب نا 10 جہاز کمکی گڑا اتسا پاکستان آ سرمسنو۔ انڈونیشیا غان ہم 2 جہاز نوکاپ زدگان تیکن کمکی گڑا اتسا داتم اسکان پاکستان آ بسنو۔ کمکی جہاز آتیان بیدس ایران آن 100 ٹن کمکی گڑا ٹرک آتا کمک اٹ پاکستان آ سرمسنے۔ نوکاپ زدگان تیکن ترکیہ نا کنڈآن مسہ ریل گاڈی و اِرا ٹرک آتیا تالان کمکی گڑا پاکستان آ گدریفنگانے۔ پاکستان نا نوکاپ زہمی تیکن تاجکستان آن 87 ٹرک آتا کمک اٹ کمکی گڑا گدریفنگانے۔ متحدہ عرب امارات و اومان آن کمکی گڑا اتسا اسہ اسہ بحری جہاز ہم پاکستان آ سرمسنو۔