اسلام آباد۔29ستمبر (اے پی پی): جانءُ سلامتی ءِ بنجاہی وزیر عبدالقادر پٹیل ءَ گشتگ کہ وبا ءُ نادراہی آں چہ اُلس ءَ را رکینگ ءِ ھاترءَ پہ وہد اثرمندیں گامگیج چست کنگءَ را الم کنگ ءَ اَنت، پُترگی کشکانی سرءَ ترندیں سرپانکی کنگءِ موہ ء ُ مراد میاں اوستمانی تک ءَ ایبولا وائرس ءَ را چہ شنگ بوہگءَ دارگ اِنت۔ پنچ شمبے ءِ روچءَ وزارتءِ نیمگ ءَ چہ جاری بیان ءِ ردءَ آئی ءَ یوگنڈا ءِ نیمگ ءَ چہ ایبولا وائرس ءَ را وبا لیکگ ءِ بازیں کیساں پد ملک ءِ پُترگی کشکانی سرءَ جانء ُ سلامتی ءِ ہوالگءَ پرمان الرٹ بہ بنت۔ آئی ءَ گشتگ کہ سوڈانی ایبولا وائرس ءِ گرء ُدار کنگ ءِ ھاترءَ درائیں پُترگی کشکانی سرءَ ترندیں سرپانکی کنگ بوہگءَ اِنت۔ آئی ءَ ایبولا وائرس ءِ ہمگرنچیں ملک آنی مسافرآنی سکریننگ ء ُ نشانیانی ہوالگءَ سرپدی ءِ پنتء ُ شون ہم کتگ ۔جان ء ُ سلامتی ءِ وزیر ءَ گشتگ کہ سوڈان ءَ چہ تچک گراب نابوہگءِ سو ب ءَ اے نیمگ ءِ کشک کارمرز کنوکیں مسافرآنی ہم سرپانکی ء ُ تھرمل سکریننگ ءَ را الم کنگ بیت، شکیگیں ءُ نشانی پدر بوہوکیں نادراہ آنی زوت رپورٹ کنگ بہ بیت۔ آئی ءَ گشتگ کہ انٹر نیشنل ہیلتھ ریگولیشنز ءِ سفارشات آنی سرءَ عمل درآمد ءَ را الم کنگ ءَ اَنت، آئی ءَ طبی عملہ ءِ تہا ایبولا تپ ءِ نشانی، نادراہ ء ُ شکیگیں نادراہ آناں جتاہ کنگ، رکینگی پوشاک ءُ ایندگہ رھبندانی ہوالگءَ سرپدی ودی کنگءِ پنت ء ُ شون ہم کتگ۔
