نیویارک ۔29ستمبر (اے پی پی):پاکستان ءَ گشتگ کہ چین ءِ پہ ملک ءِ ہارءِ آماچیں مردمانی ھاترءَ کمکی کوشست بے مٹ اَنت۔ پاکستان ءِ سفیر منیر اکرم ءَ اقوام متحدہ ءِ تہا چینی سفیر ژانگ جون ءِ مہمان جہلی ءِ تہا یک ورچوئل مراگشے ءَ گوں تران کتگء ُ پاکستان ءِ ہارءِ آماچیں مردمانی کمک ءِ ھاترءَ چین ءِ کردءَرا ساڑاتگ ء ُ گشتگ کہ اے گرانیں وہدءَ چین ءِ نیمگ ءَ پاکستان ءِ کمک کنگ بے مٹ اِنت ۔ آئی ءَ گشتگ کہ چین ءِ پہ ملک ءِ ھاترءَ کتگیں کمکی کوشست بے مٹ اَنت۔ آئی ءَ گشتگ کہ چین ءَ 30 سالانی تہا بے مٹیں دیمروئی کتگ حاس 700 ملین مردماناں نیزگاری ءَ چہ درکتگ، آئی ءَ گشتگ کہ چین ءِ پالیسی اقوام متحدہ ءِ چارٹر ءِ رھبند، ہمراہ داری ء ُ معاشی، سائنسی ء ُ تکنیکی پڑآں چین ءِ سوبمندی آئیءِ راہشونانی دور گِندی ء ُ زانت کاری ءِ عکس کشی ءَ کنت۔ آئیءَ گشتگ کہ ما پاکستان ءِ اقتصادی ء ُ چاگردی دیمروئی ء ُ جدید کارانی ھاترءَ چین ءِ سرجمیں ہمراہ داری ءَ را باز ارزشت دیاں۔ سفیر اکرم ءَ اے گپ ءَ را پدر کتگء ُ گشتگ کہ سی پیک (چین پاکستان اقتصادی راہداری) دو نیمگی کمک ءِ جوانیں دروراِت۔ آئیءَ گشتگ کہ بی آر آئی (بیلٹ اینڈ روڈ انیشیٹو)، گلوبل ڈویلپمنٹ انیشیٹو (جی ڈی آئی) ء ُ ایندگہ میکانزم ءِ وسیلگ، چین سرجمیں دنیاءَ وشھالی ءَ ر ا گیش کنگءِ ھاترءَ درائیں دیمروئی کتگیں ملک آنی ہمراہ داری ءَ کنت۔ پاکستانی سفیر ءَ گیش گشتگ کہ آ سرجمیں انسانیت ءِ ھاترءَ یک امنء ُ ایمنیں ء ُ وشھالیں بانداتءِ درگیجگ ءَ یکجاہ بوہوکیں دنیاءِھاترءَ یکجائی کوشتاناں گیش کنگءِ ھاترءَ نزیکیں کمک ءِ وداریگ اِنت۔
