بنجائی وزیر آئی ٹی و ٹیلی کمیونیکیشن سید امین الحق نا رومانیہ ٹی فیس بک نا بڑزکو کہول انا ڈل اتون اوڑدہی

اسلام آباد/بخارسٹ۔ 29 ستمبر (اے پی پی) وزیرانفارمیشن ٹیکنالوجی سید امین الحق تدوک آ دے رومانیہ ٹی میٹا نا بڑزکو کہولی ڈل اتون اوڑدہی کرے۔ اوڑدہی ٹی بنجائی وزیر و ڈل زرکاری نا وارخواہی و پاکستان اٹی سوشل میڈیا کمپنی نا رابطہ دفترنا جوڑکننگ آ گپ وتران کریر۔ داوخت آ سید امین الحق گپ وتران اٹی پارے کہ پاکستان اٹی فیس بک نا دفتر نا جوڑ کننگ اہم ءِ۔ پاکستان نا 220 ملین نا آبادی ٹی ، فیس بک نا صارف آتا کچ 45 ملین آن زیاتءِ۔ ہندن کہ رابطہ نا ڈٹ پورو مریک، بروک آ منہ سال اٹی دا کچ اِرا ہنداخہ مریک، بنجائی وزیر مستی پارے کہ دا سوشل میڈیا کمپنی کن المی ءِ کہ صارف آتون دمدستی رابطہ کن پاکستان اٹی تینا دفتر اس جوڑ کے۔ میٹا پاکستان اٹ ترندی اٹ تالان مروک آ رابطہ و انٹرنیٹ صارف آتا کچ اٹی ودکی آ است جمی نا درشانی ءِ کرے۔ فیس بک نا ڈل پارے کہ آخبت اٹ تین پہ تینی کمکاری ءِ پک کننگ کن میٹا ورس و انٹرنیٹ نا گرج ءِ و پاکستان میٹا ورس آن مریس مدتی اقتصادی فائدہ دوئی کننگ کیک۔ فیس بک نا ڈل زوت پاکستان نا دورہ ءِ کننگ نا عندیہ تس۔ اوڑدہی ٹی اقوام متحدہ نا جنیوا آفس اٹی پاکستان نا آخبتی نمائندہ خلیل ہاشمی و پاکستان نا سفیر ڈاکٹر ظفراقبال ئسک ہم ساڑی ئسر، وخت اس کہ یونیورسل سروس فنڈ انا چیف ایگزیکٹیو حارث محمود چوہدری میٹا نا ڈل ءِ پاکستان اٹی براڈ بینڈ سروسز نا ڈٹ تا بارواٹی حوال تسر ۔ فیس بک نا ڈل اٹی ڈاکٹر اسماعیل شاہ ، ڈاکٹر رابرٹ پیپر، تھامس نیوین ، مائیکل سیٹلن، مارک گیر ورڈ و الریا بینسیونگا ئسک اوار ئسر۔