اسلام آباد۔ 29 ستمبر (اے پی پی) صدر مملکت ڈاکٹر عارف علوی است انا مرض آن مروک آ مرک آتا کچ ءِ کم کننگ کن الس اٹی آگاہی ودی کننگ و جان جوڑ زند انا طرز ءِ تینا کننگ نا گرج آ زور شاغسا پارینے کہ رکھی گام گیج اختیار کننگ آن ناجوڑی نا خطرہ ءِ کم کننگ اٹ کمک ملنگ کیک ہراڑآن قومی جان جوڑی نا خیالداری نا نظام آ ہم بھاریم کم مریک۔ صدر مملکت داخیال آتا درشانی ءِ پنچ شنبے نادے آ داڑے ایوان صدر اٹی اسلام آباد نا اسہ نجی ہسپتال اسے نا کنڈآن ’’ورلڈ ہارٹ ڈے۔2022‘‘ نا رداٹ اڈ ہلوک سمپوزیم آن تران کرسا کرے۔ دود اٹی پنی آ طبی چاہندار و ایلو اہم شخصیت آک ہم بشخ ہلکر۔ اینخو ورلڈ ہارٹ ڈے ءِ ’’ ہر است اکن است انا کاریم اٹ اتنگ‘‘ نا تھیم اتون اڈتننگ انگ ءِ ہرانا مسخت مخلوق ءِ جتا وڑاٹ سجفنگ، سہی فیصلہ کننگ، ایلو فتا کمک ءِ کننگ و ہراست اکن قلبی جان جوڑی نا دوئی کننگ اٹ کمک کننگ کن زیات آن زیات بندغ آتسکان سرمننگ نا ترغیب تننگ ءِ۔ صدر مملکت دود آن تران کرسا پارے کہ پاکستان اٹی 25 درسد مرک است انا مرض آن وخت اس کہ مچ آ دنیا ٹی 18.6 ملین مرک است انا ناجوڑی و فالج نا سوب آن مریک۔ اوپارے کہ بلند فشار خون، ذیابطیس، تمباکونوشی، بے آب اٹ خور، اُولونی و جونی ورزش کپننگ امراض قلب انا ہم سوب آتیٹی اوار ءُ۔ اوپارے کہ ورزش تون اوار اوار میوہ و سوزی تیا تالان جان جوڑ غذا نا کاریم اٹ اتنگ، خیسن آ سُو، چکنائی و سی اٹ بسوک آگڑا تیان پاریز و تمباکونوشی ءِ ہلنگ تون اوار زند انا طرز اٹی بدلی آن امراض قلب ءِ توننگ مریک۔ صدر مملکت گچین و پدریسہ آگاہی مہم نا کمک اٹ ناجوڑی تیان بچفنگ نا وڑوڈول آتا بارواٹ ناجوڑ و لس مخلوق ءِ آگاہی تننگ نا اہمیت آ زور شاغا وپارے کہ نن مخلوق نا ذہنی جان جوڑی ءِ اولیت ایتن ہرا نفسیاتی چاہندار و دماغی صحت نا خیالداری فراوان کروک آتا گنج اس مفننگ کچ انا سوب آن درمان آن محروم ءُ۔
