وزیراعظم شہباز شریف نا مریم  نواز شریف و کیپٹن (ر) صفدر نا سزا تا کالعدم مننگ آ اظہار تشکر

اسلام آباد۔ 29 ستمبر (اے پی پی) وزیراعظم محمد شہباز شریف مریم نواز شریف و کیپٹن (ر) صفدر نا سزا تا کالعدم مننگ آ تشکر نا درشانی ءِ کرسا پارینے کہ سیاسی انتقام نا اسہ تہار ءُ دور اس تینا ایسر آ سرمس  وبے گناک سرسہب مسنو، عدالتی فیصلہ غان دروغ، بہتان و کڑد کشی نا ماڑی ڈغار نا تہہ ٹی ہنا، اومیت ءِ کہ کنا قائد نواز شریف نا برخلاف جج ارشد ملک ایماندار نا گواہی آ انصاف نا خواست آک پورو مریرہ۔ پنچ شنبے نادے آ تینا اسہ ٹویٹ اسے ٹی وزیراعظم پارے کہ او مریم نواز نا بری مننگ آ قائد نواز شریف ءِ مبارکبادی پیش کیک، اومیت ءِ کہ کنا قائد نا برخلاف جج ارشد ملک ایماندار نا گواہی آ انصاف نا خواست آک پورو مریرہ۔ اوپارے کہ اللہ تعالیٰ نا شکر ءِ ادا کینہ کہ مسڑ مریم و مار صفدر ءِ بالآخر انصاف ملا، اللہ تعالیٰ نا حضور ننا کاٹم شکر انا احساس اٹ شیف ءِ کہ او ننے سرسہب کرینے۔ اوپارے کہ سیاسی انتقام نا اسہ تہار ءُ دور اس اینو ایسر آ سرمس و بےگنا ک سرسہب مسنو، مریم نواز شریف و کیپٹن (ر) صفدر نرزوری، صبر و ثابت قدمی اٹ مشکل حالیت آتون مون تسر، عدالتی فیصلہ غان دروغ، بہتان و کڑد کشی نا غٹ ماڑیک ڈغار نا تہہ ٹی ہنانو۔ وزیراعظم پارے کہ ایون فیلڈ ریفرنس اٹی مریم نواز نا بریت احتساب نا پن انا نظام نا بوز آ ترند ءُ چپانٹ اسے، ہرانا کمک اٹ شریف خاہوت ءِ شست کننگا، عدالت آن بری مننگ آ مسڑ مریم و صفدر ءِ مبارکبادی ایتیوہ۔