اسلام آباد۔ 29 ستمبر (اے پی پی) الخدمت فاؤنڈیشن ، زکواۃ فاؤنڈیشن امریکہ نا کمک اٹ پاکستان اٹی نوکاپ زہمی تیٹی 140 ٹن برنج بشخک۔ داہیت ءِ پنچ شنبے نادے آ داڑے الخدمت فاؤنڈیشن نا صدر محمد عبدالشکور و زکواۃ فاؤنڈیشن امریکہ نا ایگزیکٹیو ڈائریکٹر فرخ رضا پاکستان نا نوکاپ آن زہمی علاقہ غاتیٹی اسیجائی کمکی سرجزآتا بابت پریس کانفرنس کرسا پاریر۔فرخ رضا پارے کہ زکواۃ فاؤنڈیشن امریکہ، الخدمت نا کمک اٹ نوکاپ زہمی تیٹی 140 ٹن برنج بشخنگ اٹی ءِ۔ زکواۃ فاؤنڈیشن امریکہ ٹی رہینگوک آ مسلمان تا رفاہی ادارہ ءِ ہرا پاکستان تون اوار دنیا نا ایلو ملک آتیٹی رفاہی کاریم تیٹی پیش پیش مریک۔ اوپارے کہ پاکستان اٹی ساڑی آ نوکاپ آن پد زکواۃ فاؤنڈیشن الخدمت تون اواری اٹ کمکی سرجزآتا بناءِ کرے و داسہ پین 140 ٹن برنج سندھ وبلوچستان نا 32 نوکاپ زہمی ضلع غاتیا گدریفنگ انگ ءِ، جم وڑاٹ 10 ہزار خاہوت آتسکان دا کمک ءِ سرکننگک۔ زکواۃ فاؤنڈیشن نوکاپ زہمی تا بحالی ٹی ہم الخدمت تون اواری اٹ کاریم کننگ نا ارادہ تخک۔ محمد عبدالشکور داوخت آ پارے کہ الخدمت فاؤنڈیشن نا نوکاپ زہمی تیکن کوشست آتیٹی ہراڑے پاکستانی الس الخدمت تون پبی کمک کننگ ءِ ہموڑے پیشن نا ملک رہینگوک پاکستانی و ڈونر ادارہ غاک ہم کس اسے آن پدی افس۔ زکواۃ فاؤنڈیشن امریکہ ہم نوکاپ زہمی ایڑھ و ایلم تا کمک کن الخدمت تون کوشست کننگ ءِ۔
