اسلام آباد۔ 29 ستمبر (اے پی پی) ایشیائی شونداری بینک و شونداری شریدار آک ساڑی آ نوکاپ آن پد امداد، تعمیر نو و بحالی نا سرجز آتیٹی پاکستان تون پورو کمکاری نا باوری کرفینو وخت اس کہ بنجائی وزیر اقتصادی امور سردار ایاز صادق پارے کہ حکومت زرگزران و اسلو ب حکمرانی ٹی گچینی کن اصلاحات نا عمل ءِ مون آ دننگ اٹ سنبرینگوک ءِ۔ اوداہیت ءِ ایشیائی شونداری بینک انا کثیر الجہتی شریدار آتا 55 می سالانہ دیوان نا وخت آ بینک انا سینئر انتظامیہ تون گپ وتران و اوڑدہی تیٹی پارے۔ سردار ایاز صادق پاکستانی ڈل انا کماشی ءِ کننگ ءِ وخت اس کہ ڈل اٹی سیکرٹری اقتصادی امور کاظم نیاز، ایشیائی شونداری بینک اٹی پاکستان نا نمائندہ و ایگزیکٹیو ڈائریکٹر نور احمد و وزارت اقتصادی امور نا سینئر آفیسر آک اوار ءُ۔ ایشیائی شونداری بینک گروپ نا صدر ماسا تو گو آسا کاوا تون اوڑدہی ٹی گروپ نا صدر پاکستان اٹی ساڑی آ پِر ونوکاپ آن مروک آ نسخان تیا است ہسونی نا درشانی ءِ کرے۔ اوبنجائی وزیر و پاکستانی ڈل ءِ امداد، ریسکیو و تعمیر نو و بحالی نا سرجزآتیٹی بینک انا پورو کمکاری نا باوری کرفے۔ اوپاکستان اٹی خاص وڑاٹ بجلی، گورننس و مالیاتی بشخ آتیٹی اصلاحات کن کوشست آتا ہم ستاءِ کرے وپارے کہ داڑآن پاکستان ءِ تینا نمونا کچ آن پبی فائدہ ہرفنگ و نوکاپ آن پد زوت بحالی نا موقع ملک۔ بنجائی وزیر پاکستان کن پدریسہ امداد و کمکاری آ ایشیائی شونداری بینک انا منت واری ءِ ہرفے و باور کرفے کہ ساڑی حکومت زرگزران و گورننس نا اہم بشخ آتیٹی اصلاحات نا نفاذ کن سنبرینگوک ءِ۔ اووزیراعظم پاکستان نا کنڈآن گروپ نا صدر ءِ ساڑی آ نوکاپ نا تباہ کن اثر آتے ہُننگ کن پاکستان نا دورہ ءِ کننگ نا سلہ ہم خلک۔
