اسلام آباد۔ 29 ستمبر (اے پی پی) ترکیہ نا البائراک گروپ نوکاپ زدہ پاکستان اٹی 4،000 تمبو بشخا، گروپ مدام پاکستانی الس تون ہم کوپہ سلنگ نا عزم انا درشانی ءِ کرینے ۔ البائراک گروپ نا رداٹ گروپ ترکیہ نا ڈیزاسٹر اینڈ ایمرجنسی مینجمنٹ اتھارٹی (اے ایف اے ڈی ) و پاکستان نا نیشنل ڈیزاسٹر مینجمنٹ اتھارٹی (این ڈی ایم اے) نا کمک اٹ پاکستان اٹی آفت آن زہمی علاقہ غاتیٹی 4000 تمبو گدریفینے۔ البائراک گروپ نا ڈائریکٹر سیمل سینوکاک پارے کہ نن مدام پاکستان تون سلنہ۔ البائراک گروپ اولیکو دے آن پاکستان اٹی نوکاپ نا بھسکاری تا جاچ ءِ ہلک و اے ایف اے ڈی و این ڈی ایم اے تون اواری اٹ نوکاپ زدہ علاقہ غاتیٹی اول سر آن خیمہ بستی جوڑ کرے۔ اوپارے کہ نن نوکاپ زدگان تے 4،000 تمبو فراوان کننگ کن خاص چکار کرینن کہ مون تروک آ ایم ٹو 16 و ایم ٹو 12 نا تمبو تے نوکاپ زدگان تے تننگ انگ ءِ ہراکہ یخ انا موسم کن پائیدار ءُ انتئے کہ داسہ ہم پِرک برجاءُ۔ تمبو تا اولیکو کھیپ نوکاپ آن زیات زہمی صوبہ سندھ انا شار دادو کن روانہ کننگا تانکہ ٹینٹ سٹی اس جوڑ کننگ مرے۔ اوپارے کہ نن این ڈی ایم اے تون کمک کننگ اٹی اُن و نن اونا راہشونی اٹ ضرورت مند آتسکان تمبو تے سرکننگ اٹ سرسہب مسونن۔ گروپ نا ڈائریکٹر سیمل سینوکاک پارے کہ پاکستان اٹی 14 جون آن بناکروک آ بشام نا پِر تیٹی بروک آ نوکاپ آن بدترین بھسکاری مس۔ ڈیہہ نا ایلو ملک آتیانبار پاکستان اٹی ہم بشام نا موسم عام وڑاٹ ترند پِر تیٹی مریک، ولے دا سال 1961 آن پد آن غٹ آن زیات تباہ کن ئسک۔ داوخت آ ملک انا اسہ تہائی بشخ دیر اٹی ءِ۔ تباہ کن پِر و نوکاہپ سویلی ایشیائی ایٹمی ملک اٹی 12،718 کلومیٹر (7،902 میل) سڑک، 390 پول و ماڑی تے ہم درینے۔ ملک انا کم و ود 220 ملین آبادی آن 33 ملین آن زیات نوکاپ آن زہمی مسنو ، ہرانا سوب آن انفراسٹرکچر ءِ کم و ود30 بلین ڈالر نانسخان رسینگانے۔ ملک انا کم و ود 45 دسد فصل مہالو آن نوکاپ نا مون اٹی بسنو، ہراڑآن غذائی رکھ ءِ بھاز خطرہ مون تروک ءِ۔
