اسلام آباد۔ 29 ستمبر (اے پی پی) ورلڈ ہیلتھ آرگنائزیشن نا ہیلتھ ایمرجنسی پروگرام نا ایگزیکٹیو ڈائریکٹر ڈاکٹر مائیک ریان، پاکستان اٹی جہانی ادارہ جان جوڑی نا نمائندہ ڈاکٹر پالیتھا مہیپالا، و ڈبلیو ایچ او نا ٹیم بلوچستان نا نصیر آباد ڈویژن اٹی نوکاپ آن زہمی ضلع غاتا دورہ ءِ کریر و نوکاپ زہمی تیکن ایمبولینس و ایلو طبی گڑا بطور عطیہ کمشنر نصیر آباد ڈویژن نا دوٹی تسر۔ داوخت آ وزارت قومی جان جوڑی نا سیکرٹری حافظ طائر و کمشنر نصیر آباد ڈویژن بشیر بنگلزئی ئسک ڈویژن نا چندی ضلع غاتیٹی نوکاپی حالیت و نوکاپ آن تالان مروک آ ناجوڑی تا بارواٹی حوال تسر وخت اس کہ چیف سیکرٹری بلوچستان عبدالعزیز عقیلی ویڈیو لنک انا کمک اٹ ڈاکٹر ریان و اونا ٹیم ءِ بلوچستان آ بننگ آ بخیر اٹ پارے۔ چیف سیکرٹری گرج انا وخت محکمہ جان جوڑی نا کمک ءِ کرسا ڈیہہ ٹی ڈبلیو ایچ او نا کڑد انا ستاءِ کرے۔ ڈبلیو ایچ او نا کنڈآن پین کمک کننگ نا عزم انا درشانی ءِ کرسا ڈاکٹر ریان پارے کہ ننے دنیا ءِ پاروئی ءِ کہ بے اُرا بندغ، لکھ آ مخلوق تنکی نا گواچی ءِ۔ داموسمیاتی آفت نا بابت حقی گرج آک ءُ۔ نن وسیلہ، پیسہ، مخلوق و گڑاتا پٹنگ کن ہرممکن کوشست کننگ کن سنبرینگوک اُن۔ اسہ پورو ءُ آپریشن اس بایدے مرے، ننتون وخت ءِ زیان کننگ نا ہچ ءُ موقع اس اف، اگہ نن وخت و موقع ءِ زیان کینہ تو مخلوق کہیک۔ سہی چکار کننگتو تو مخلوق کن مشکل ودک۔ ہنداخاطرآن ننے اسہ وخت اٹی بھاز انگا کاریم تے کروئی مریک۔ ڈاکٹر ریان مستی پارے کہ نصیر آباد ڈویژن بلوچستان نا پنی آ آبپاشی و کشاری ڈویژن آن اسٹ ءِ۔ دا صوبہ بلوچستان ءِ سندھ اتون ملفک۔ دامچ آ پاکستان اٹی ساڑی آ ترند پِر و نوکاپ آن غٹ آن زیات زہمی علاقہ ءِ۔ بھاز انگاک تینا جون تیان دوتے سلانو ، و ہزار آ مخلوق بےاُرا، ساہدار و کشت وکشار آن محروم مسنو۔ ہند آتا بھسکاری نا سوب آن مخلوق سڑک آتیا پناہ ہلکونے۔ ترند پِر تا سوب آن نوکاپی دیر تا سوب آن نئے بیرہ کشت و کشار و ہند آک بھس مسنو بلکن علاقہ ٹی وڑوڑنا ناجوڑی ہم تالان مننگ ءِ ہرافتے ٹی ملیریا، ٹائیفائیڈ، دست و ایلو کنوئی آ دیر و غیر صحت بخش خور انا سوب آن ناجوڑیک تالان مننگ اٹی ءُ۔
