سکھر۔ 29 ستمبر (اے پی پی) جہانی ادارہ جان جوڑی (ڈبلیو ایچ او) نا ہیلتھ ایمرجنسی پروگرام نا ایگزیکٹیو ڈائریکٹر ڈاکٹر مائیک ریان دا عزم انا درشانی ءِ کرینے کہ اونا ادارہ سندھ و بلوچستان نا نوکاپ زہمی تا پبی کمک کن ودکی وسیلہ فراوان کیک تانکہ حکومت نا کوشست آتیٹی کمک فراوان کرسا نوکاپ اٹی اختہ بندغ آتسکان زوت آن زوت جان جوڑی نا آسراتی تا فراوان ءِ پک کننگ مرے۔ داہیت ءِ او تدوک آ دے کمشنر سکھر غلام مصطفیٰ پھل اتون اونا دفتراٹی سکھر ڈویژن اٹی ریکوری آپریشن تیا حوال ترسا پارے۔ ڈاکٹر مائیک ریان ہرا پاکستان نا ہلہلہ ئی دورہ غاٹی ءِ، سکھر نا نوکاپ زدہ علاقہ غاتا دورہ ءِ کرے و زہمی تا ہلہلہ ئی بحالی نا بابت امور نا جاچ ءِ ہلک۔ اوپارے کہ بھسکاری داخہ در بھلن ءِ کہ جہانی تنظیم و جہانی برادری ءِ ترندی اٹ کاریم کروئی تمک۔ او2010 نا نوکاپ نا موازنہ ءِ کرسا پارے کہ دا اسہ موسمی بھسکاری اسے و ننے ترندی اٹ کاریم کننگ نا گرج ءِ۔ ڈاکٹر مائیک ریان پارے کہ ڈبلیو ایچ او پڈپُر آ زالبول آتیکن و ملیریا و دیر آن ودی مروک آ ناجوڑی تے توننگ کن پین دوائی و ہیلتھ کٹ فراوان کیک۔ کمشنر غلام مصطفیٰ ڈبلیو ایچ او نا ڈل ءِ حوال ترسا پارے کہ سکھر ڈویژن اٹی جم وڑاٹ 25 لکھ 60 ہزار بندغ نوکاپ آن براہ راست زہمی مسنو ، اُرا و فصل آتے ہم نسخان رسینگا ، داسہ کم کھیت آتیٹی دیر سلوک ءِ و چندی خلق و یونین کونسل دیر اٹی اختہ ءُ ہراتسکان حکومتی مشینریک ہم سرمننگ کپسہ۔ اوپارے کہ پراونشل ڈیزاسٹر مینجمنٹ اتھارٹی (پی ڈی ایم اے ) کمکی سرجزآتے مربوط کننگ ءِ وخت اس کہ ڈپٹی کمشنر آک ہلہلہ ئی کمک و بحالی نا کاریم تا فوکل پرسنک ءُ۔
