نیویارک۔ 29 ستمبر (اے پی پی) پاکستان پارینے کہ چین نا ملک انا نوکاپ زدگان تیکن کمکی کوشست آک بے مٹ ءُ۔ پاکستان نا سفیر منیر اکرم اقوام متحدہ ٹی چینی سفیر ژانگ جون نا مہمانداری ٹی اڈ ہلوک اسہ ورچوئل بیابخیری اسے آن تران کرسا پاکستان نا نوکاپ زدہ مخلوق نا کمک کن چین انا کڑد انا ستاءِ کرسا پارے کہ دا مشکل وخت اٹی چین نا پاکستان نا کنڈآن کمک بے مٹ ءِ و او چین نا پاکستان ناکنڈآن آخبت مخ تفی ءِ پک کیک۔ اوپارے کہ چین 30 سال اٹی بے مٹ شون ہلک خاص وڑاٹ 700 ملین بندغ ءِ نیزگاری آن کشانے، اومستی پارے کہ چین نا پالیسیک اقوام متحدہ نا چارٹر نا اصول، کثیر الجہتی نا مخ تفی آ مبنی ءُ و زرگزرانی، راجی ، سائنسی و تکنیکی بشخ آتیٹی چین نا بھلا سرسہبیک اونا راہشون تا بصیرت و پامداری نا ڈیک ءِ ایترہ۔ اوپیدوار کرے کہ چین و پاکستان پت انا قابل سنگت ءُ و ہڑتوم آ ملک آتا سنگتی وتواجہ بریبری، اسہ ایلو نا تہہ نا باندات آتیٹی نیام تمپننگ و تین پہ تینی شرف آ مبنی ءُ۔ اوپارے کہ نن پاکستان نا اقتصادی و راجی شونداری و جدید کاری کن چین نا پدریسہ و اہم مخ تفی نا قدر ءِ کینہ۔ سفیر اکرم داہیت ءِ تالان کرسا پارے کہ سی پیک( چین پاکستان اقتصادی راہداری ) تین پہ تینی کمکاری نا گچین ءُ درور اسے۔ اوپارے کہ بی آر آئی(بیلٹ اینڈ روڈ انیشیٹو)، گلوبل ڈویلپمنٹ انیشیٹو(جی ڈی آئی) و ایلو میکانزم تا کمک اٹ ، چین مچ آ دنیا ٹی شونہالی ءِ ودفنگ کن غٹ پدتموک ملک آتا مخ تفی ءِ کیک۔ پاکستانی سفیر مستی پارے کہ او مچ آ انسانیت کن اسہ پرامن و شونہال آخبت نا پٹنگ اٹ متحد دنیا کن اسیجائی وکشست آتے مون آ دننگ کن پدریسہ خڑکی کمکاری نا چاری ءِ۔
