ساڑی آ پِر و نوکاپ اٹی انتظامیہ نا کارکڑد بھاز جوان ئسک، ترجمان بلوچستان حکومت

کوئٹہ۔ 28 ستمبر (اے پی پی) ترجمان بلوچستان حکومت فرح عظیم شاہ چارشنبے نادے آ پی ڈی ایم اے آفس نا دورہ ءِ کرسا ڈائریکٹر جنرل نصیر خان ناصر تون اوڑدہی کرے۔ اوپارے کہ زندہ قومک قدرتی آفت آتا مقابلہ ءِ صبر و سگ، گچین حکمت عملی و گچین پلاننگ اٹ کیرہ، بلوچستان اٹی ساڑی آ پِر و نوکاپ اٹی پاک فوج پی ڈی ایم اے نا آفیسر وعملہ، ایف سی و انتظامیہ نا کارکڑد بھاز جوان ئسک ہراکہ نئے بیرہ صوبائی بلکن ڈونر ایجنسی تیکن ذکر انا قابل گام اسے۔ اوپارے کہ وزیراعلیٰ بلوچستان نا پارت آ چندی سنگت ملک آتا سفارت خانہ و ملکی و درملکی عطیہ تروک آ کمکی ورفاہی ادارہ غاتون اوڑدہی کرسا اوفتے پِر تیٹی مچ آ بلوچستان اٹی مروک آ مالی و جانی نسخان تیان معلومدار کرے تانکہ ریلیف آپریشن آن پد زہمی اُرا و کشاری ڈغارتا آبادکاری نا گچین پلان اس جوڑ کننگ مرے و دارداٹ پی ڈی ایم اے و ایلو ادارہ غاتے اہم ءُ کڑد اس ادا کروئی مریک تانکہ زہمی خاہوت آتے پدی تینا نت تیا سلفنگ کین۔ داوخت آ پی ڈی ایم اے نا ڈائریکٹر جنرل نصیر خان ناصر ترجمان بلوچستان حکومت فرح عظیم شاہ ءِ حوال ترسا پارے کہ پِر تیان زہمی ضلع غاتیٹی داتم اسکان مروک آ ریسکیو و ریلیف نا سرجز، راشن نا بشخنگ و پی ڈی ایم اے نا کوشست آتیان چندی ضلع غاتیٹی پاک فوج، ایف سی و ضلعی انتظامیہ نا کمکاری آن زہمی خاہوت آتے مشکل نا داساہت اٹی کمک کننگانے بھاز زوت جوائنٹ سروے نا بناءِ کرسا نسخان تا پوروی ءِ کننگک۔