پی ٹی آئی والاک اخہ در پیسہ جلسہ غاتیا زیان کریر ہموفتے زہمی تیا خلکرہ شاید اِرا ضلع آباد مسرہ، احسن اقبال

اسلام آباد۔ 28 ستمبر (اے پی پی) بنجائی وزیر ڈٹ بندی، شونداری، اصلاحات و خصوصی گام گیج احسن اقبال پارینے کہ پی ٹی آئی والاک اخہ در پیسہ جلسہ غاتیا زیان کریر ہموفتے زہمی تیا خلکرہ شاید اِرا ضلع آبادہ مسرہ۔ چارشنبے نادے آمیڈیا تون گپ وتران اٹی احسن اقبال پارے کہ نارووال اسپورٹس سٹی ریفرنس عدالت خارج کرے۔ الف لیلیٰ نا سٹی  ءُ کسہ اس جوڑ کرسا تقسیم ودی کننگا، کنا برخلاف بے بنداو ریفرنس جوڑ کننگا و بے بنداو مقدمہ جوڑ کرسا کڑد کشی ءِ کننگا۔ اوپارے کہ عمران نیازی مخلوق ءِ ریفنگ ءِ۔ عمران نیازی نا دور اٹی کرپشن کننگا، اسہ تہائی پاکستان نوکاپی دیر اٹی ڈبنگوک ءِ و عمران نیازی پدریسہ تینا سیاست ءِ چمکائفنگ اٹی لگوک ءِ، اخس پیسہ جلسہ غاتیا زیان کننگ ءُ زہمی تیا خلکرہ شاید اِرا ضلع آباد مسرہ۔ احسن اقبال پارے کہ عمران نیازی بروک آ گچین کاری کن فنڈ یکجا کننگ ءِ، شوکت خانم نا پن آ یکجا کروکآ فنڈ آتے سیاست اٹ خڑچ کننگا، ادارہ غاتا برخلاف تقریر کیک، عمران نیازی فارن فنڈنگ آن پاکستان اٹ بے چیٹی ودی کننگ نا کاریم ہلیک، عمران نیازی نا مسخت آئین ءِ لتاڑنگ ءِ، او پاہک سائفر نا جاست و پاست مریک تو پارلیمنٹ اٹی برینہ، انت عمران نیازی درملکی ایجنسی اسے آن جاست وپاست کرفنگ خواہک؟ ۔ اوبیرہ انارکی خواہک، غٹ انٹیلی جنس ایجنسی، وزارت خارجہ، سلہہ بند فوج پارے کہ سائفر اٹی ہچ اس اف، اسہ ایٹمی واک اس غلام مننگ کپک، پاکستانی قوم کس اسے نا غلام اف۔ آڈیو لیکس سنگین ءُ باندات اسے، جاست وپاست کن بڑزکو کہولی کمیٹی اس جوڑ کننگانے، آڈیو لیکس ریاست کن بھلو چیلنج اسے ، بھاز زوت دانا خڑک آ رسیگنہ، ننا اولیکو اولیت و ایسر نوکاپ زدگان آتا کمک ءِ، ہراتم اسکان ایڑھ و ایلم تے دُوارہ اوفتا نت تیا سلفپن آسرات تولپنہ۔