روپئی نا قدر اٹی سوگوی، کبینی و شرح سود اٹی کمتی حکومت نا اولیت ءِ، تاریخ ننا زرگزرانی کارکڑد نا گواہ ءِ، بنجائی وزیر خزانہ سینیٹر اسحاق ڈار

اسلام آباد۔ 28 ستمبر (اے پی پی) بنجائی وزیر خزانہ سینیٹر اسحاق ڈار پارینے کہ ڈالر نا مقابلہ ٹی روپئی نا قدر اٹی سوگوی و کبینی و شرح سود اٹی کمتی حکومت نا اولیت ءِ، نن بیرہ زبانی دعویٰ تیا باور کپنہ بلکن تاریخ ننا زرگزرانی کارکڑد آتا گواہ ءِ، عمران خان ملکی زرگزران ءِ ناقابل تلافی نسخان تسنے، عمران خان پاکستان نا ہمو حال ءِ کرے ہراوڑ اسہ دشمن اس ہم کپک، پی ٹی آئی نا مسکوہی حکومت نا بدانتظامی نا سوب آن ملک داوخت آ بدترین زرگزرانی تنکی نا گواچی ءِ، مسکوہی پی ٹی آئی حکومت ہرا گند ءِ اِلانے او شش تُو اٹی ساف مننگ کتو، وزیر خزانہ مفتاح اسماعیل نا کوشست آتا سوب آن ملک ڈیفالٹ آن بچا۔ داخیال آتا درشانی ءِ او چارشنبے نادے آ وزارت خزانہ نا پیشن میڈیا تون گپ وتران کرسا کرے۔ اوپارے کہ پاکستان نا الس کن بارودی سرنگ تالان کرینے، عمران خان تینا کرتوت آتیا اللہ غان معافی خواہ، زرس خدا نا خوف ءِ کر و پاکستان ءِ چلینگ کن ہلے۔ اسحاق ڈار است ہسونی نا درشانی ءِ کرے کہ پی ٹی آئی حکومت تینا آخیریکو دے تیٹی سیاسی فائدہ ہرفنگ کن جہانی معاہدہ غاتا خلاف ورزی ءِ کرے۔ اوپارے کہ او تدوک آ 34 سال آن پدریسہ خراج ادا کروک آءِ و او تینا خراج گوشوارہ غاتیٹی وخت اس ہم ہرے کتنے۔ اوپارے کہ تدوک آ حکومت ہم اونا پاسپورٹ ءِ منسوخ کریسس و دا ساڑی آ مخلوط حکومت ئسک ہرااودے پاسپورٹ جاری کریسس۔ اوپارے کہ قیاس آرائی کروک آتے ہندی کرنسی گوازی کننگ نا موکل تفننگک۔ اوداتاثر ءِ مسترد کرے کہ مسلم لیگ (ن) نا حکومت 2013 آن 2018 ٹی تینا دور اٹی روپئی نا قدر ءِ زیات تخنگ کن مارکیٹ اٹی ڈالر انجیکٹ کرے۔ اوپارے کہ نن زرمبادلہ نا کوڑی تے 23 ارب ڈالر نا ریکارڈ کچ آ درے۔ اوپارے کہ نن مارکیٹ اکانومی آ باور کینہ، دا مسلم لیگ ن نا حکومت ئسک ہرا مارکیٹ بیسڈ ایکسچینج ریٹ درستی راستی کرفیسس۔ اسحاق ڈار پارے کہ ملک ءِ مشکل چیلنج مون تروک ءِ ولے مستین آنبار داڑتون مون تننگک۔ اوپارے کہ ہراتم ن  لیگ حکومت ءِ اِلا تو زرگزرانی شرح نمو 6.3 درسد ئسک، کبینی ٹی کمتی مسوسس، مسہ دھرنہ متورہ تو زرگزرانی شرح نمو ہفت ءُ نیم درسد مسکہ، پاکستان ایٹمی قوت ءِ زرگزرانی قوت اس جوڑ مننگ کریکہ، روپئی نا بھسکاری ءِ کننگا و ہندا سوب آن کبینی مس، کبینی نا سوب آن شرح سود اٹی ودکی مس، قوم ءِ چیلنج مون تروک ءِ نن مستین اٹی ہم چیلنج آتے قبول کرین، 2013 ٹی اسہ جہانی ادارہ اس ہم پاکستان ءِ پیسہ تننگ کن تیار الوکہ۔ اوپارے کہ دابھاز بھلو دروغ اسے کہ نن ڈالر خسان، ڈالر ننتون الوکہ ہی مارکیٹ اٹی ڈالر امر خسان، داوخت آ امپورٹڈ کبینی ءِ دادے سہی وڑاٹ ہروئی مریک ، کس اسے پاکستان نا کرنسی تون گوازی کننگ نا موکل مفک، اِرادے اٹی روپئی گچین مسنے آخبت ہم گچین مریک۔