چاگڑدی بدلی نا اثر آک مچ آ دنیا ءِ تینا پلویڑ اٹی ہلکونو، سینیٹر شیری رحمان

اسلام آباد۔ 28 ستمبر (اے پی پی) بنجائی وزیر چاگڑدی بدلی سینیٹر شیری رحمان پارینے کہ چاگڑدی بدلی نا اثرآک مچ آ دنیا ءِ تینا پلویڑ اٹی ہلکونو ، دارداٹ کسادبازاری نا پاکستان تون اوار جہانی سویل آ خراب ءُ اثر تمک۔ چارشنبے نادے آ تینا اسہ ٹویٹ اسے ٹی اوپارے کہ ورلڈ ٹریڈ آرگنائزیشن دنیا ءِ جہانی کساد بازاری (رسیشن ) نا بابت خبڑدار کرینے، چاگڑدی بدلی و برجا جہانی تصادم کساد بازاری نا سوب جوڑ مننگ ءُ، پاکستان ءِ مہالو آن پِر و نوکاپ نا سوب آن خور و رسینگ نا بھاز ویل مون تروک ءِ۔ شیری رحمان پارے کہ نوکاپ نا سوب آن ننا بنداوی پنجر تون اوار کشت وکشار و ہن و برنا نظام ءِ نسخان مسنے، 46 لکھ ایکڑ رقبہ غا سلوک فصل آتے نسخان مسنے، داتم اسکان نا کساس نا رداٹ 481 ارب روپئی نا فصل و تیار فصل آک بھس مسنو، 13 ہزار کلومیٹر آن زیات سڑک و 410 پول آتے نسخان رسینگانے۔ اوپارے کہ ہن وبر نا نظام و خور انا تنکی نا سوب آن بھاز انگا سختیک پیش بننگ کیرہ، چاگڑدی بدلی نا اثر آک مچ آ دنیا ءِ تینا پلویڑ اٹی ہلکونو، کساد بازاری نا جہانی سویل آ خراب اثر تمک، چاگڑدی بدلی نا اثرآتا سوب آن غٹ ملک آک اسہ پوسکن ءُ تنکی سے نا کنڈآ ہِننگ ءُ۔