حقدار نوکاپ نا زہمی تیٹی داتم اسکان 50 ارب روپئی آن زیات نا زر بشخنگانے، بنجائی وزیر شازیہ مری

کراچی۔ 28 ستمبر (اے پی پی) بنجائی وزیر تخفیف نیزگاری و راجی رکھ شازیہ مری پارینے کہ داتم اسکان بینظیر ایمرجنسی کیش امداد نا رداٹ نوکاپ زہمی 20 لکھ خاہوت آتیٹی 25 ہزار روپئی فی خاہوت کمکی زر بشخنگانے، حقدار نوکاپ نا زہمی تیٹی داتم اسکان 50 ارب روپئی آن زیات نا زر بشخنگانے و داتم اسکان دا چرجوئی برجاءِ۔ جاری بیان نا رداٹ او پارے کہ وزیراعظم محمد شہباز شریف نوکاپ زہمی تیٹی 25، 25 ہزار روپئی فی خاہوت تننگ نا  پڑو کریسس ہرانا زمواری ءِ بینطیر انکم سپورٹ پروگرام ءِ تننگاسس۔ اوپارے کہ پاکستان داوخت آ نوکاپ نا سوب آن بھاز سنگین حالیت آتون مون تننگ اٹی ءِ ، ننا پورو کوشست ءِ کہ ایلو ہرافک رہینگانو اوفتسکان ہم 25 ہزار روپئی نا کمکی زر سرکننگے۔ شازیہ مری پارے کہ کمکی زر آن ناجائز کٹوتی کروک آتا برخلاف سخت ایکشن ہلکن، اوار کرمنل زموار آتے دزگیر ہم کرفینن۔ اوپارے کہ ای تینٹ بینظیر انکم سپورٹ پروگرام نا جوڑ مروک کیمپ آتا دورہ ءِ کرسا مچ آ عمل ءِ مانیٹر کننگ اٹی اُٹ، ہراڑے کٹوتی نا شاہدی تتون غاو ملک ہموڑے دمدستی کارروائی کننگک۔ بنجائی وزیر پارے ک بینظیر انکم سپورٹ پروگرام نا مچ آ عملہ و ٹیم میدان اٹی ساڑی ءُ، مشکل و مواصلاتی نظام درہم برہم مننگ آن پد ہم بینظیر انکم سپورٹ پروگرام نا ٹیمک کشتی تیٹی سوار مرسا زہمی تیٹی کمکی زر بشخنگ اٹی ءُ۔