اسلام آباد۔ 28 ستمبر (اے پی پی) چیئرمین سینیٹ محمد صادق سنجرانی پارینے کہ نوکاپ نا زہمی تیٹی موسم نا شدت نا سوب آن ناجوڑی تیٹی ودکی نا گڑتی ءِ، سندھ و بلوچستان نا زہمی ضلع غاتیٹی المی دوا و جان جوڑی نا آسراتی تا کمتی مون تروک ءِ۔ سینیٹ سیکرٹریٹ آن جاری بیان نا رداٹ داخیال آتا درشانی ءِ او میڈسن سان فرنٹیئر ڈاکٹرز ود آؤٹ بارڈرز نا ڈل اتون گپ وتران کرسا کرے ہرا چارشنبے نادے آ اوڑتون اوڑدہی کریر۔ چیئرمین سینیٹ نوکاپ زہمی تے جان جوڑی نا آسراتی فراوان کننگ آ ایم ایس ایف نا کڑد انا ستاءِ کرے۔ او پارے کہ سندھ و بلوچستان نا نوکاپ آن زہمی نیزگار مخلوق ءِ جان جوڑی نا بنداوی آسراتی تا دمدستی فراوانی وخت انا اہم ءُ گرج اسے۔ نوکاپ آن زہمی علاقہ غاتیٹی دینی مرض آتا تالان مننگ نا خطرہ پدریسہ ساڑی ءِ۔ سندھ و بلوچستان نا زہمی ضلع غاتیٹی المی دواو جان جوڑی نا آسراتی تا کمتی مون تروک ءِ۔ چیئرمین سینیٹ پارے کہ سندھ و بلوچستان اٹی پِر و نوکاپ نا بھسکاری تیان بھلو کچ اسے آ نسخان مسنے۔ چیئرمین سینیٹ ڈل ءِ زہمی علاقہ غاتا دورہ ءِ کننگ نا بارواٹ ہم معلومدار کرے۔ اوپارے کہ موسم نا شدت نا سوب آن ناجوڑی تیٹی ودکی نا گڑتی ءِ ، جہانی ادارہ غاک مون آ بریر۔ لکھ آ مخلوق بے اُرا، انفراسٹرکچر بھس و سد آ مرک مسنے، لکھ ایکڑ آ سلوک فصل آک بھس مسنو۔ غٹ سخی، جہانی غیر سرکاری تنظیم و رضاکار حکومتی ادارہ غاتے کمک فراوان کیر تانکہ ریلیف و بحالی نا کاریم ءِ ترند کننگ مرے۔ چیئرمین سینیٹ ڈل ءِ تینا کنڈآن پبی کمکاری نا باور کرفے۔ اوڑدہی ٹی ڈل نوکاپ نا بھسکاری تیا است ہسونی نا درشانی ءِ کرے و ڈل ادارہ غاتا کاریم نا بابت چیئرمین سینیٹ ءِ معلومدار کرے۔ اوپارے کہ ہندی ادارہ غاتون اواری اٹ ریلیف نا کاریم ءِ ترند کننگ اٹ کمک فراوان کننگ اُن۔ ایلو جہانی ادارہ غاتون ہم رابطہ ٹی اُن۔ ڈل باسک آک پاریر کہ (ایم ایس ایف) مچ آ دنیا ٹی جان جوڑی نا بابت خذمت سرتننگ اٹی ءُ۔ ایم ایس ایف کیہی دہائی آن پاکستان اٹی ہم جان جوڑی نا بشخ اٹی خذمت سرتننگ اٹی ءِ۔
