اسلام آباد۔ 28 ستمبر (اے پی پی) وزیراعظم محمد شہباز شریف پارینے کہ نن مسکوہی حکومت نا بدترین ڈیوالئی و غیر زمواری نا بھاریم ءِ ہرفین و ملک ءِ ڈیفالٹ مننگ آن بچفین، پی ٹی آئی حکومت جہانی معاہدہ کرسا اوفتے لتاڑا ہراڑآن ریاست پاکستان آ جہانی برادری نا پت مجروح مس، پیٹرولیم مصنوعات آتا نہاد آتیٹی کمتی نا پڑو کرے ولے بجٹ اٹی سبسڈی کن زر جتا کتو ہرانا سوب آن الس ءِ پیٹرولیم نا نہاد آتیٹی ودکی و کبینی نا بھاریم ءِ ہرفوئی تما۔ چارشنبے نادے آ بنجائی کابینہ نا دیوان آن تران کرسا وزیراعظم وزیرخزانہ اسحاق ڈار ءِ کابینہ نا دیوان اٹی بخیر اٹ پارے۔ وزیراعظم پارے کہ او تینا و کابینہ نا کنڈآن اودے وزارت خزانہ نا منصب ءِ سنبھالنگ آ مبارکبادی پیش کیک و اونا سرسہبی کن دعا کیک، او جوان ءُ سیاستدان اسے و مستین اٹی ہم تینا آزموندہ، مہارت، خواری و ایماندار نا سوب آن گچین خذمت سرتسنے۔ وزیراعظم دااومیت نا درشانی ءِ کرے کہ مخلوط حکومت ءِ اونا بطور وزیر خزانہ شمولیت آن سوگوی ملک۔ وزیراعظم مسکوہی وزیرخزانہ مفتاح اسماعیل نا خذمت آتے خراج تحسین پیش کرسا پارے کہ او بھاز خواری اٹ دے و نن کاریم کرسا پاکستان ءِ ڈیفالٹ نا حالیت آتیان بچفے، اوبھاز قابلیت و خواری اٹ تینا زمواری ءِ ادا کرے۔ وزیراعظم پارے کہ مسکوہی حکومت نا بدترین ڈیوالئی و ہیبدار کارکڑد نا بھاریم ءِ نن ہرفین، ننے تکلیف ءِ کہ السءِ کبینی نا بھاریم ءِ ہرفوئی تما ولے نن دا حالیت آتا زموار اَلون، مسکوہی حکومت پیٹرولیم مصنوعات آتا نہاد آتے یکدم کم کرے وخت اس کہ دنیا ٹی نہاد آک آسمان تون ہیت کریرہ ولے بجٹ اٹی سبسڈی کن ہچ ءُ زر اس جتا کتو، مسکوہی حکومت معاہدہ غاتے لتاڑا ہرانا سوب آن پاکستان وام تیٹی اختہ مس و آئی ایم ایف نا شڑت آک پین سخت مسر، ریاست پاکستان آ جہانی برادری نا پت مجروح مس، مسکوہی حکومت تینا کروک آ معاہدہ غاتا پاسداری ءِ کتو ہرانا سوب آن ننے دنیا ٹی شکی گری تون مون تروئی تما کہ نن ہرا قول ءِ کینہ اودے پورو کپنہ۔ وزیراعظم آئی ایم ایف تون ڈیل سرسہبی اٹ ایسر اسکان سرکننگ آ مفتاح اسماعیل ءِ شاباشی تس۔ وزیراعظم کابینہ ءِ سمرقند اٹی شنگھائی کمکار تنظیم نا دیوان نا وخت آ چین، روس، ترکیہ و نیامی ایشیائی ملک آتا سرکڑدہ و راہشون تتون مروک آ مثبت و تعمیری اوڑدہی و گپ وتران تیان ہم معلومدار کرے و پارے کہ اونا کنکٹیویٹی و گیس انا فراوانی نا بابت گپ وتران مسنے، اوہڑتوم آ کنڈآتا گپ وتران اٹی نوکاپ نا حالیت آتا بابت ہم جہانی راہشون تے معلومدار کرینے۔ وزیراعظم شنگھائی کمکار تنظیم و اوکان پد اقوام متحدہ نا جنرل اسمبلی نا دیوان نا وخت آ بلاول بھٹو زرداری، شیری رحمان، مریم اورنگزیب تون اوار بنجائی وزیر آک و دفترخارجہ نا تعلقدار کمامدارآتا پبی کمکاری و خواری آ اوفتے منت واری ءِ ہرفے۔
