اسلام آباد۔ 27 ستمبر (اے پی پی) وزیراعظم نا خصوصی کمکار نارکوٹکس عطاء تارڑ پارینے کہ پنجاب حکومت ملک دشمن بیانیہ نا رکھ اکن استعمال مننگ ءِ، پیشن نا ملک بدتمیزی کروک آ بندغ آتا برخلاف کانودی کارروائی کننگک، وزیراعظم پاکستان شہبازشریف نئے بیرہ پاکستان نا کیس ءِ گچین وڑاٹ اقوام متحدہ نا جنرل اسمبلی ٹی پیش کرے ، بلکن ایلو ملک آتا سربراہان مملکت آتون ہڑتوم آ کنڈآتا اوڑدہی تیٹی ہم پاکستان نا کیس اتون پبی وڑاٹ مون تس۔ خاص وڑاٹ چاگڑدی بدلی نا باندات آتیا شرہ مس۔ داخیال آتا درشانی ءِ او سے شنبے نادے آ پریس انفارمیشن ڈیپارٹمنٹ اسلام آباد اٹی پریس کانفرنس آن تران کرسا کرے۔ اوپارے کہ وزیر حوالکاری و شینکاری مریم اورنگزیب تون ہرا واقعہ پیش بس او بھاز است ہسونی نا سوب ءِ و دابابت مریم اورنگزیب نا حوصلہ ءِ داد ایتنہ کہ ہراوڑ او سگ انا درشانی ءِ کرے ولے دا رویہ بھاز ہرے اسکان چلینگ کپک۔ ہرافک ہموڑے اونا رند ءِ ہلکر، اودے زیزاریفیر دابابت ای اسہ درخواست اس جوڑ کرینٹ ہرادے وزارت داخلہ ٹی جمع کرفیوہ۔ ہراتم پاکستانی اس ملک آن پیشن کاہک و ویزا اپلائی کیک تو پولیس نا کنڈآن، حکومت پاکستان نا کنڈآن گڈ کریکٹر نا سرٹیفکیٹ جاری کننگک یعنی ویزا جاری کروک آ ملک ءِ باوری کرفنگک کہ ہندا بندغ نا برخلاف کیس اس یا پین ڈوہ اس اف ولے ہراوڑ مسلم لیگ (ن) نا راہشون تے زدو کوب کننگ و ہلڑبازی نا چرجوئی و ٹرینڈ بناکرینے داناقابل قبول ہم ارے و ناقابل برداشت ہم ارے۔ کوشست مریک کہ داوڑنا مخلوق نا کریکٹر سرٹیفکیٹ آتے منسوخ کننگے و برطانیہ داخلہ آفس ءِ اوفتا عکس آتون معلومدار کننگک ۔ ہراتم دا کارروائی مون آ چلینگک تو نائیکوپ نا منسوخی و پاسپورٹ ہم منسوخ مننگ کیک۔
