اسلام آباد۔ 27 ستمبر (اے پی پی) پاکستان پارینے کہ او خطرہ غاتیان پد ہم پرامن سویلی ایشیا نا مسخت نا دوئی کننگ کن سنبرینگوک ءِ و 1974 اٹی دا چرجوئی ٹی سویلی ایشیا ءِ جوہری سلہہ غاتیان پاک کننگ کن چندی سلاہ پیش کرے ولے بدبختی اٹ جوان ردعمل ظاہر کننگتو۔ داہیت ءِ اقوام متحدہ ٹی پاکستان نا آخبتی مندوب منیر اکرم جوہری سلہہ غاتا چٹفنگ نا جہانی دے آ اقوام متحدہ نا جنرل اسمبلی نا دیوان اٹی پارے۔ اوجوہری سلہہ غاتیان پاک دنیا نا مسخت نا دوئی کننگ کن پاکستان نا عزم انا درشانی ءِ کرے ہرادے غٹ ریاست آتیکن بدل مفروک سیکورٹی اتون جہانی، قابل تصدیق، و انصاف اٹ دوئی کننگک۔ پاکستانی مندوب بھارت نا پن ءِ ہلنگ آن بیدس پارے کہ سویلی ایشیا ٹی ، جوہری سلہہ غاتا لائخ اسہ ریاست اس 1974 اٹی درستی راستی کرفیسس۔ ہمو ریاست 1998 ٹی سویلی ایشیا نا جوہری سلہہ غاتا دھماکہ غاتا بناءِ ہم کریسس۔ پاکستان ءِ سٹریٹجک سوگوی نا بحالی و دا جارحیت ءِ توننگ کن اونا پیروی ءِ کننگ آ بیوس کننگاسس ہراڑآن پاکستان ءِ 11 مئی 1998 نا ننا ہمسایہ ملک انا جوہری سلہہ غاتا دھماکہ غاتا دمدستی پد دھڑکو تننگا سس۔ اوپارے کہ پاکستان سویلی ایشیاٹی سٹریٹجک ریسٹرینٹ رجیم (ایس آر آر) نا جوڑ کننگ نا سلاہ ءِ پیش کرے، ہرا نا بنداو ءِ تین پہ تینی جھیڑہ غاتا ایسری، جوہری و میزائل ٹیکنالوجی نا بے تالانی و روایتی سلہہ غاتا توازن آ مریک۔
