اسلام آباد۔ 27 ستمبر (اے پی پی) وزیرخارجہ بلاول بھٹو زرداری نا امریکی وزیرخارجہ انٹونی بلنکن تون واشنگٹن اٹی مروک آ اوڑدہی ٹی امریکہ پاکستان اٹی نوکاپ آن زہمی کمکی سرجزآتیکن 56.1 ملین ڈالر نا مہالو آن پڑو کروک امداد آن بیدس 10 ملین ڈالر امداد نا پڑو کرینے۔ سے شنبےنادے آ دفترخارجہ نا ترجمان نا رداٹ وزیر خارجہ بلاول بھٹو زرداری واشنگٹن اٹی امریکی وزیرخارجہ انٹونی بلنکن تون اوڑدہی کرے۔ وزیرخارجہ امریکی ہم منصب ءِ پاکستان اٹی نوکاپ آن مروک آ بھسکاری نا بارواٹی پارے ہراٹی 33 ملین آن زیات مخلوق بے اُرا مسنو و نہادی جانی نسخان آن بیدس معاش نا ذریعہ ءِ بھاز نسخان رسینگانے۔ اوپاکستان نا حکومت و الس نا کمکی کوشست آتا بارواٹی امریکی وزیر خارجہ ءِ معلومدار کرے و امداد آ امریکی حکومت نا منت واری ءِ ہرفے۔ وزیرخارجہ پارے کہ اسہ ملک اس ہم دا سخت تنکی تون تینٹ مون تننگ کپک۔ اوداہیت آ زور شاغا کہ پاکستان موسمیاتی بدلی آن غٹ آن زیات زہمی مروک آ ملک آتیٹی اوار ءِ حالانکہ چاگڑد دشمن گیس آتیٹی اونا بشخ مفننگ نا بریبر ءِ۔ وزیرخارجہ پارے کہ پاکستان موسمیاتی انصاف نا خواہندار ءِ و او دارداٹ تینا شریدار آتا کنڈآ ہُننگ ءِ تانکہ او دا موسمیاتی آفت آن پیش تمنگ اٹ ننا کمک ءِ کیر۔ وزیرخارجہ پارے کہ پاکستان آبپاشی ، مواصلات ، توانائی، کشاری ٹیکنالوجی و جان جوڑی کون آ بشخ آتیٹی گچین، سرسوز و موسمیاتی لچکدار انفراسٹرکچر نا تفنگ کن سنبرینگوک ءِ۔ اوپارے کہ پدتموک ملک آتے موسمیاتی تنکی نا گچین وڑاٹ مون تننگ اٹ کمک کن دمدستی گام گیج آتا گرج ءِ۔ وزیرخارجہ ڈیہہ ٹی امن ، سلامتی و اقتصادی شونہالی نا مون آ دننگ کن پاکستان امریکہ تعلقداری نا تاریخی و ودوک آ اہمیت آ زور شاغا۔ اوخاص وڑاٹ واپار و زرکاری نا بشخ آتیٹی امریکہ تون تینا تعلقداری تے پین گیشتر کننگ نا پاکستان نا عزم انا درشانی ءِ کرے و پارے کہ ہڑتوم آ ملک آک تینا سفارتی تعلقداری تا قیام نا 75 می سال دے ءِ جوان وڑاٹ اڈتننگ اٹی ءُ و بروک آ چین تیکن اسہ اومیت افزا و تین پہ تینی وڑاٹ فائدہ مند روڈ میپ اس تیار کننگ اٹی ءُ۔ امریکی وزیرخارجہ پاکستان اٹی نوکاپ آن نہادی جان تا زیان و اقتصادی نسخان آ پاکستان تون ہڑزخواہی و یکجہتی نا درشانی ءِ کرے۔ اوپارے کہ پاکستان اٹی بے پناہ گمان تا رداٹ امریکی نجی بشخ توانائی نا بشخ اتون اوار پاکستان اٹی زرکاری کننگ خواہک۔ وزیر خارجہ بلاول بھٹو زرداری انسانی تنکی تون مون تننگ کن اوغانستان نا کمک نا گرج انا درشانی ءِ کرے و دا ہیت آ زور شاغا کہ پاکستان اوغانستان اٹی امن، شونداری و سوگوی نا دوئی کننگ کن جہانی برادری تون اواری اٹ کاریم ءِ برجاتخک۔ امریکی وزیر خارجہ اوغان آن پیش تمنگ نا وخت آ پاکستان نا کنڈآن مخ تفی آ ہم منت واری ءِ ہرفے۔ محکمہ خارجہ ٹی پاکستان و امریکہ نا نیام اٹ سفارتی تعلقداری تا قیام نا 75 می سال دے ءِ اڈتننگ نا دود انا وخت آ امریکی وزیر خارجہ انٹونی بلنکن نوکاپ زدگان تیکن ودکی 10 ملین ڈالر نا پڑو کرے ہرانا پاکستان نا وزیر خارجہ اونا منت واری ءِ ہرفے۔
