دادو۔ 27 ستمبر (اے پی پی) وزیراعظم محمد شہباز شریف پارینے کہ نوکاپ زہمی علاقہ غاتیٹی ریسکیو و ریلیف نا کاریم برجاءِ ، نوکاپ نا زہمی تیٹی 42 ارب بشخنگانے، سندھ اٹی ایلو زہمی تے ہم زوت 25 ہزا ر روپئی امداد ملک، دا وخت نمبر گیم یا جلسہ، جلوس آتا اف بلکن زہمی تا کمک ءِ کننگ نا وخت ءِ، جہانی برادری، سنگت ملک آتا منت واری ءِ ہرفنہ ہرافک دا مشکل وخت اٹی ننا کمک ءِ کریر، ننے اواری اٹ پاکستان ءِ عظیم تر جوڑ کروئی ءِ، غٹ وسیلہ و لائخی تے کاریم اٹ اتسا دا مصیبت آن پیش تمنہ۔ او سے شنبے نادے آ دادو نا دورہ غان پد صحافی تتون گپ وتران کریکہ۔ وزیراعلیٰ سندھ سید مراد علی شاہ و صوبائی کابینہ نا باسک آک ہم اوڑتون اوار ئسر۔ وزیراعظم شہباز شریف پارے کہ سہون شریف نا دورہ ءِ کرے، داسہ دادو ٹی ساڑیءِ، ہرجاگہ غا دیر بھسکاری کرینے، سہون شریف و دادو ٹی داسہ ہم دیر ارے، 1600 آن زیات بندغ بشمول مار و مسنک دنیا ءِ اِلانو، 13 لکھ ساہدار تے دیر درینے، لکھ آ ایکڑ آ سلوک کرپاس نا فصل و برنج نا فصل آتے نسخان رسینگانے، لکھ آ اُراک بھس مسنو۔ اوپارے کہ پاکستان ءِ ساڑی آ نوکاپ آن 30 ارب ڈالر نانسخان مسنے، غٹ سخی تا است انا حب اٹ منت واری ءِ ہرفیوہ ہرا دا زہمی تا کمک ءِ کننگ اٹی ءُ۔ اوپارے کہ صوبائی حکومت آک پبی کاریم کننگ اٹی ءُ، سندھ اٹی وزیراعلیٰ سندھ سید مراد علی شاہ نا کماشی ٹی حکومت زہمی تا ہرممکن کمک ءِ کننگ ءِ، زہمی تا تمبو تا شار جوڑ مسنے ، کن و خور نا گڑا زہمی تسکان سرکننگ انگ ءِ، سلہہ بند فوج، پی ڈی ایم اے و ایلو ادارہ غاک کاریم کننگ ءُ۔ اوپارے کہ 3 کروڑ 30 لکھ بندغ دا نوکاپ آن زہمی مسنو، مچ آ پاکستان زہمی تا کمک کن است انا حب اٹ کمک کننگ ءِ، ہزار آ کلومیٹر سڑک، ریلوائی پول آتے دیر درینے، سہون آن پد مچ آ انڈس ہائی وے دیر اٹی ڈبنگوک ءِ۔ اوپارے کہ مشکل نا داساہت اٹی بنجا و صوبہ غاتے اواری اٹ کاریم کروئی ءِ ، سیاست آن پاریز کرسا اواری اٹ کاریم کننگے، داوخت آ نمبرز گیم آخا، زہمی تا کمک نا گرج ءِ۔ اوپارے کہ ثمر قند اٹی ایس سی او ملک آتا دیوان اٹی پاکستان نا نوکاپ نا حالیت آتے مون آتخاٹ، ہرا ملک آک دامشکل اٹی ننتون کمک کننگ ءُ اوفتا منت واری ءِ ہرفنہ۔ اوپارے کہ اقوام متحدہ نا جنرل اسمبلی ٹی تقریر اٹی پاکستان اٹی نوکاپ و او ڑتون پیش بروک آ مشکل آتے دنیا نا مون آتخاٹ، دنیا دا مشکل اٹی ننا ہرا کمک ءِ کرے اوفتا منت وار، پین کمک نا گرج ءِ۔ اوپارے کہ درجہ حرارت ودنگ آن موسمیاتی بدلی مننگ ءِ، درجہ حرارت ءِ ودفنگ اٹ پاکستان نا اسہ درسد ہم بشخ اف۔ اوپارے کہ زہمی تیٹی داتم اسکان 42 ارب روپئی بشخنگانے، زہمی تے 25 ہزار تننگ انگ ءِ، سندھ انا ہرا علاقہ غاک رہینگانو اوفتے ہم زوت 25 ہزار روپئی نا امداد ملک۔ اوپارے کہ ننے پاکستان ءِ عظیم آن عظیم تر جوڑ کروئی ءِ۔ غٹ وسیلہ و واکداری تے کاریم اٹ اتینہ، دامصیبت نا وخت ءِ داڑآن سرسہبی اٹ پیش تمنہ۔
