دادو۔ 27 ستمبر (اے پی پی) وزیراعظم محمد شہباز شریف ضلع دادو نا خلق جھاکرو ٹی نوکاپ زہمی تیکن جوڑ خیمہ بستی نا دورہ ءِ کرے و اوفتے تروک آ آسراتی تا جاچ ءِ ہلک۔ داوخت آ وزیراعلیٰ سندھ مراد علی شاہ ہم ساڑی ئسک ۔ وزیراعظم ءِ ضلع دادو ٹی نوکاپ آن مروک آ نسخان، کمکی سرجز و بحالی نا گام گیج آتا بابت سرجم حوال تننگا۔ وزیراعظم ءِ پاننگاکہ نوکاپ آن ضلع ٹی داتم اسکان 37 بندغ زوال و 22 ٹھپی مسنو، ٹھپی مروک آتا کچ اٹی ہڑدے ودکی مننگ اٹی ءِ۔ داکان بیدس لکھ آ ایکڑ آ برنج و ایلو فصل آک بھس مسنو۔ لکھ آ ساہدار تے دیر درینے۔ نوکاپی دیر سلنگ نا سوب آن خولم نا دسنگ تاخیر نا گواچی ءِ۔ دیر تے کشنگ کن گام گیج کننگ انگ ءِ و اومیت ءِ 8 آن 10 دے اٹی دیر تے کشنگک۔ وزیراعظم ءِ پاننگاکہ نوکاپ زہمی تیکن مچ آ ضلع ٹی 17 خیمہ بستی و200 آن زیات کمکی کیمپ جوڑ کننگانے۔ 215 آن زیات کمکی کیمپ جوڑ کننگانے۔ سلہہ بند فوج و سول ادارہ غاتا کارندہ ریسکیو، ریلیف و بحالی نا عمل اٹی اواری اٹ کاریم کننگ اٹی ءُ و کمکی کیمپ آتیٹی زہمی تے غٹ آسراتی فراوان کننگ انگ ءِ۔ نوکاپ زہمی تیکن میڈیکل کیمپ ہم جوڑ کننگانے۔ نوکاپ آن ضلع نا غٹ علاقہ غاک زہمی مسنو۔ تمبو و ایلو گڑاتا گرج ءِ۔ مخلوق نا اُراتیٹی ہِننگ آن پد اوفتے ہنکین کن پین تمبو درکارمریک۔ داکان بیدس واٹر سپلائی، سڑک، ہسپتال، اسکول و ایلو بنداوی پنجر نا تعمیر نو کن ہم وافر فنڈ آتا گرج مریک۔ وزیراعظم خیمہ بستی ٹی نوکاپ زہمی تیکن جوڑ میڈیکل کیمپ انا ہم دور ہ ءِ کرے و درمان مروک ناجوڑ آتیان طبی آسراتی تا بابت اَریفے و اوفتے باور کرفے کہ درمان نا گچین آسراتی فراوان کننگک۔ وزیراعظم خیمہ بستی ٹی جوڑ عارضی اسکول آ ہم ہنا و او زہمی چناتتون گپ وتران کرے۔ داوخت آ وزیراعظم زہمی چناتے گچین تعلیمی آسراتی تا فراوانی سمارٹ اسکول جوڑ کننگ نا ہم پڑو کرے۔ وزیراعظم پارے کہ دا بھاز خوشی ناہیت اسے کہ نوکاپ زہمی تا کمک کن غٹ اواری اٹ کاریم کننگ اٹی ءُ و مشکل وخت اٹی زہمی تا کمک ءِ کننگ انگ ءِ۔ وزیراعظم نوکاپ زہمی تا ریسکیو، ریلیف و بحالی کن کروک آ گام گیج آتا ستاءِ کرے۔
