اسلام آباد۔ 26 ستمبر (اے پی پی) چین نا پیپلز ایسوسی ایشن فارفرینڈ شپ ودفارن کنٹریز(سی پی اے ایف ایف سی) پاکستان نا نوکاپ زہمی تا امداد وبحالی کن 125 ملین یوان نا عطیہ تسنے۔ نوکاپ زدگان تے عطیہ نا پڑو چین نا پیپلز ایسوسی ایشن فارفرینڈ شپ ودفارن کنٹریز نا صدر لین سونگ تیان اسہ خصوصی ءُ دود اسے ٹی کرے ہراٹی چین اٹی پاکستان نا سفیر معین الحق و ایلوکمامدار آک بشخ ہلکر۔ دود اٹی سی پی اے ایف ایف سی نا صدر نوکاپ آن زہمی خاہوت آتون تینا ڈکھیائی و ہڑزخواہی نا درشانی ءِ کرسا پارے کہ تباہ کن نوکاپ نا رداٹ چین نا حکومت و الس پاکستان نا امداد و بحالی نا کوشست آتیٹی خاطر خواہ کمک کرینو۔ اوپارے کہ پاکستان ءِ امداد نا فراوانی تون اوار اوار ہڑتوم آملک آتا نیام اٹ یکتا سنگتی و سوگو تعلقداری ءِ۔ اوپارے کہ چین برجاامداد آن بیدس زہمی علاقہ غاتیٹی نوکاپ آن پد بحالی و بنداوی پنجر نا شونداری ٹی ہم تینا کڑد ءِ ادا کیک۔ داوخت آ تران کرسا چین اٹی پاکستان نا سفیر معین الحق نوکاپ زدگان تیکن پاکستان نا برجاکمکی کوست آتے سوگوی تننگ کن پیپلز ایسوسی ایشن فارفرینڈ شپ ود فارن کنٹریز و چین نا ہندی حکومت و کاروباری ادارہ غاتا وخت آ کمک نا ستاءِ کرے۔
