اسلام آباد/جنیوا۔ 26 ستمبر (اے پی پی) بنجائی وزیر انفارمیشن ٹیکنالوجی سید امین الحق تون جنیو اٹی اقوام متحدہ ٹی پاکستان نا آخبتی نمائندہ خلیل ہاشمی و رومانیہ ٹی پاکستانی سفیر ڈاکٹر ظفراقبال ئسک اوڑدہی کرینو۔ بخارسٹ رومانیہ ٹی مروک آ دا اسیجائی اوڑدہی ٹی خلیل ہاشمی بنجائی وزیر ءِ آئی ٹی یو الیکشن نا بابت پاکستانی اومیتدار انوشے رحمان کن لابنگ نا سرجم آتیان معلومدار کرے۔ داوخت آ بنجائی وزیر سید امین الحق ہڑتوم آ سفیر آتے پارت کرے کہ الیکشن اٹی انوشے رحمان نا سرسہبی کن ہرممکن کوشست کننگے و او تینٹ ہم دا چرجوئی ٹی بطور بنجائی وزیر آئی ٹی کانفرنس اٹی بروک آ ایلو ملک آتا وزیر آتون اوڑدہی ہم کیک۔ خلیل ہاشمی سید امین الحق ءِ معلومدار کرے کہ ڈائریکٹر نا اہم عہدہ غا 6 اومیتدار ءُ ، و سخت مقابلہ نا گمان ءِ۔ یات سلے کہ بنجائی وزیر آئی ٹی سید امین الحق آئی ٹی یو کانفرنس اٹی بشخ ہلنگ کن ہفتہ غا رومانیہ غا سرمسوسس، 4 دے ئی دورہ ٹی او جہانی راہشون و آئی ٹی یو کمامدارآتون اوڑدہی تیان بیدس پاکستانی اومیتدار انوشے رحمان نا سرسہبی کن ہم کوشست آتیٹی لگوک ءِ۔
