راولپنڈی۔ 26ستمبر (اے پی پی) پاک فوج انا ہیلی کیپٹر بلوچستان نا علاقہ ہرنائی نا خڑک آ تمسا بھس مس ہراٹی 2 پائلٹ آتون اوار ہیلی کیپٹر اٹی سوار غٹ 6 ورناشہید مسنو۔ پاک فوج انا شعبہ تعلقات عامہ (آئی ایس پی آر) نا رداٹ پاک فوج انا ہیلی کیپٹر استو بلوچستان نا علاقہ ہرنائی نا خڑک آ فلائنگ مشن اٹی تمسا بھس مس۔ شکست اٹی شہید مروک آتیٹی پائلٹ میجر محمد منیب افضل، پائلٹ میجر خرم شہزاد ئسک اوار ءُ، ایلو عملہ ٹی نائیک جلیل، صوبیدار عبدالواحد، سپاہی شعیب و سپاہی محمد عمران ئسک اوار ءُ۔ میجر خرم شہزاد نا وئی 39 سال ئسک و اونا تعلق اٹک آن ئس، او پدسلوک آتیٹی زائیفہ و اسہ مسڑ اس اِلانے، شہید آتیٹی اوار میجر محمد منیب افضل نا وئی 30 سال ئس ، اونا تعلق راولپنڈی آن ئسک وخت اس کہ او وارث آتیٹی اِرا مار اِلانے۔ است ہسون شکست اٹی شہید صوبیدار عبدالواحد نا وئی 44 سال ئسک، او کرک نا خلق صابر آباد نا ہنکینی ئسک، اونا 3 مار و اسہ مسڑ اسے تون اوار 4 چناءُ۔ شہید محمد عمران نا وئی 27 سال ئسک، او مخدوم پور خانیوال نا ہنکینی ئسک، او 2 مسڑ و اسہ مار اسے نا باوہ ئسک۔ شہید نائیک جلیل نا وئی 30 سال ئسک، او ضلع گجرات نا ہنکینی ئسک، اونا 2 چناءُ، شہید سپاہی شعیب نا وئی 35 سال ئسک و او ضلع اٹک نا ہنکینی ا س ئسک۔ یات سلے کہ داکان مست اگست اٹی ہم پاک فوج انا اسہ ہیلی کیپٹر اسے بلوچستان نا ضلع لسبیلہ ٹی شکست پیش بسوسس ہراٹی لیفٹیننٹ جنرل سرفراز علی تون اوار غٹ 6 آفیسر و ورناک شہیدی نا جام ءِ نوش کریر۔
