اسلام آباد ۔ 5 مئی (اے پی پی) سینیٹ ئِ قائمہ کمیٹی برائے مذہبی کار آنی چییئرمین سینیٹر مولانا حافظ حمد اﷲ ئَ چمن ئَ پاک اوگان بارڈر ئِ سر ئَ اوگان سیکورٹی فورسز آنی کور ئُ کائی تیر گواری ئُُ ایشی ئِ نتیجگ ئَ گران بھائیں بنی آدم آنی جانی تاوان ئِ ھوالگ ئَ یک مذمتی منگ نامہ ئِ سینیٹ سیکریٹریٹ ئَ جم کت ایشی ئِ تہئَ لوٹ کنگ بوتگ کہ چمن ئِ اُلس آنی رکھینگ ئِ واستہ جوانیں گامگیج زورگ بہ بیت۔ آدینگ ئِ روچ ئَ سینیٹ سیکریٹریٹ ئَ سینیٹر مولانا حافظ حمد اللہ ئِ نیمگ ئَ چہ جم کتگیں منگ نامہ ئِ تہ ئَ گوشت بوت کہ چمن ئَ پاک اوگان بارڈر ئِ سرئَ اوگان فورسز آنی کور ئُُکائی تیر کاری ئَ چہ 8مردم ئَ چہ گیش بیران بوتگ ایشانی تہ ئَ زالبول ھم ھوار اَنت وھدیکہ 29مردم ٹپیگ بوتگ اَنت۔ رستگیں ھال آنی رد ئَ ایشانی تہ ئَ زھگ، پیریں مردم ئُُ زالبول ھوار اَنت، مذمتی منگ نامہ ئِ تہ ئَ لوٹ کنگ بوتگ کہ اے گولہ باری جہاز آنی وسیلگ ئَ میتگ ئُُ لوگ آنی سر ئَ کنگ بوھگ ئَ اِنت۔ منگ نامہ ئِ تہئَ لوٹ کنگ بوتگ کہ ٹپیگ آناں سرکاری تک ئَ درمان ئُُ تہلگ کنگ بہ بیت ئُُ گولہ باری ئِ نتیجگ ئَ بیران بوتگیں مردم آنی سیاد ئُُ وارس آناں زرّّک مرّک دیگ بہ بیت ئُُ چمن ئِ شہری مردم آناں آیوکیں اے رنگ ئِ واکیہ آں چہ رکھینگ ئِ ھاترا جوانیں گامگیج چست کنگ بہ بیت۔
