اسلام آباد۔ 23 ستمبر (اے پی پی) اسپیکر قومی اسمبلی راجہ پرویز اشرف و ڈپٹی اسپیکر زاہد اکرم درانی ئسک پارینو کہ پاکستان سعودی عرب تون تینا متکن آ برادرانہ تعلقداری تے بھاز اہمیت ایتک۔ اوپارے کہ ہڑتوم آ ملک آتا تعلقداری تین پہ تینی شرف و پت آٹی ءِ و ہڑتوم آ ایلم اسلامی ملک آک مدام ہر علاقائی وجہانی فورم آ اسہ ایلو نا موقف نا مخ تفی ءِ کرینو، ہڑتوم آ قومک ہرمشکل وخت اٹی اسہ ایلو تون ہم کوپہ سلیسنو۔ اوفک داخیال آتا درشانی ءِ سعودی عرب نا 92 می قومی دے انا وخت آ تینا جتا جتا کلہو آتیٹی کریر۔ اسپیکر قومی اسمبلی خادم حرمین شریفین شاہ سلمان بن عبدالعزیز ، ولی عہد شہزادہ محمد بن سلمان ، شوریٰ کونسل نا چیئرمین ڈاکٹر عبداللہ ءِ مبارکبادی ترسا پارینے کہ سعودی عرب مدام مشکل وخت اٹی پاکستان تون پبی تفینے۔ اوتباہ کن نوکاپ اٹی زہمی تیکن سعودی مملکت و الس نا کنڈآن تروک آ امداد آ سعودی حکومت و الس نا منت واری ءِ ہرفے۔ اسپیکر ہڑتوم آ ایلم اسلامی ملک آتا پارلیمان تا نیام اٹ رابطہ غاتے پین مون آ دننگ نا گرج آ زور شاغسا پارے کہ ہڑتوم آ ملک آتا پارلیمان تا نیام اٹ رابطہ غاتیٹی ودکی آن ہڑتوم آ کنڈآتا تعلقداری پین سوگو مریک و زرگزرانی و راجی کمکاری نا پوسکن ءُ کسر ملنگک۔ داوخت آ ڈپٹی اسپیکر زاہد اکرم درانی سعودی عرب نا حکومت و الس ءِ 92 می قومی دے انا وخت آ مبارکبادی ترساپارے کہ پاکستان سعودی عرب تون تینا تعلقداری تیا گمر محسوس کیک۔ اوپارے کہ سعودی عرب پاکستان نا ہرمشکل اٹی تفینے و ہڑتوم آ ملک آک مشکل نا ہر ساہت اٹی اسہ ایلو تون ہم کوپہ سلیسنو۔ اوپارے کہ پاکستان واپار، زرکاری و ایلو راجی و اقتصادی بشخ آتیٹی کمکاری ءِ پین ودفنگ نا خواہندار ءِ۔
