ٹرانس جینڈر ایکٹ نا مسخت شناخت تننگ ءِ، اگہ اعتراض اس بسنے تو میڈیکل بورڈ اس بایدے جوڑ کننگے، خواجہ سعد رفیق

لاہور۔ 23 ستمبر (اے پی پی) مسلم لیگ ن نا مرکزی راہشون و بنجائی وزیر ریلوائی خواجہ سعد رفیق پارینے کہ ٹرانس جینڈر ایکٹ آ اگہ اعتراض اس بسنے تو دا باندات آ میڈیکل بورڈ اس بایدے جوڑ کننگے ، دا ایکٹ نا مسخت شناخت تننگ ءِ تانکہ خواجہ سراتا شناختی کارڈ جوڑ مننگ کے، کس اسے حق تننگ آن محروم کننگ مفک، دا 2018 ٹی پاس مسنے، سوج دادے کہ اینو دانا انت اکن خیال بس۔ لاہور اٹی احتساب عدالت پیشی نا وخت آ میڈیا تون گپ وتران کرسا خواجہ سعد رفیق پارے کہ ملک اٹی نوکاپ بسنے و عمران خان لانگ مارچ نا ہیت ءِ کیک و پاہک کہ لانگ مارچ کیوہ و اسلام آباد ءِ بند کیوہ، عمران خان ءِ لانگ مارچ آن توپنہ، کانود نا دنگ اٹ مرسا برانز کننگ غٹ انا حق ءِ، عمران خان ہم کانود نا دنگ اٹی مرے۔ خواجہ سعد رفیق پارے کہ داوخت آ نوکاپ آن مسہ کروڑ مخلوق ڈبینگ انگ ءُ، مخلوق بے اُرا مسنو، اوفتے کن کُننگ کن ہچ اس اف وداحالیت آتیٹی عمران خان دمدستی پوسکن آ گچین کاری تا خواست ءِ کننگ ءِ ہرا اونا بے حسی و خودغرضی ءِ۔ خواجہ سعد رفیق عمران خان نا تدوک آ دے کیس اٹی معافی نا ذکر ءِ کرسا پارے کہ کس اس چپیکو گلی آن پیش تمنگ ءِ تو کس اس کیہی سال اسکان سزاکاٹک۔ بنجائی وزیر ریلوائی پارے کہ کنا کیس اٹی چار جج بدل مسنو ولے کنے داسہ ہم انصاف نا اومیت ءِ۔ پنجاب حکومت نا بدلی نا بابت اسہ سوج اسے آ مسلم لیگی راہشون خواجہ سعد رفیق پارے کہ پنجاب حکومت بدل مننگ یا آخا، کنے سمااف۔