اسلام آباد۔ 23 ستمبر (اے پی پی) بنجائی وزیر مواصلات و پوسٹل سروسز اسعد محمود ڈیرہ اسماعیل خان آن ملتان اسکان نا ہلہلہ ئی دورہ ءِ کرے، قومی شاہراہ مظفرگڑھ آن میانوالی آ تعمیر و مرمت نا کاریم اٹی سست روی آ بنجائی وزیر مواصلات دمدستی وڑاٹ این ایچ اے نا جنرل منیجر محمد جہانگیر ءِ بٹنگا۔ بنجائی وزیر سرائے مہاجر آن فتح پور روڈ انا ہم خوڑتی اٹ جاچ ءِ ہلک۔ این ایچ اے نا شعبہ تعلقات عامہ نا کنڈآن جاری بیان نا رداٹ بنجائی وزیر مواصلات و پوسٹل سروسز اسعد محمود ڈیرہ اسماعیل خان آن ملتان اسکان نا سفر اٹی سرائے مہاجر آن فتح پور روڈ و قومی شاہراہ مظفر گڑھ آن میانوالی آ مروک آ تعمیر ومرمت نا کاریم اٹی سست روی ءِ خنسا ترندی نا درشانی ءِ کرے۔ اواصلاح احوال کن دمدستی وڑاٹ این ایچ اے نا جنرل منیجر محمد جہانگیر ءِ بٹنگا و تعمیری عمل اٹی سست روی آ تعلقدار عملہ نا ترندی اٹ سرزنش ءِ کرے۔ دادورہ ٹی بنجائی وزیر مواصلات ءِ سویلی پنجاب اٹی نوکاپ نا تازہ حالیت آتا بارواٹی این ایچ اے نا جنرل منیجر افتخار ساجد سرجمی اٹ حوال تس۔ بنجائی وزیر داڑے نوکاپی حالیت آتون وخت آ مون تننگ آ این ایچ اے نا تعلقدار کمامدار آتا ستاءِ کرے۔ اوپارے کہ نوکاپی دیر تیان چندی قومی شاہراہ و پول آک زہمی مسنو، ولے این ایچ اے نا انجینئر و تعلقدار عملہ نا وخت آ کارروائی تیان تعمیر و مرمت نا کاریم پورو مس۔ اواین ایچ اے نا کارکڑد نا بھاز ستاءِ کرے۔ داوخت آ بنجائی وزیر ءِ ہندی پوسٹ ماسٹر جنرل محمد شاہد جاوید ہم ادارہ نا کارکڑد آن معلومدار کرے۔ بنجائی وزیرءِ ڈی آئی جی موٹروے پولیس ہم دا قومی شاہراہ غا چلینگوک آ ٹریفک نا حالیت آتیان معلومدار کرے، ہراڑآ بنجائی وزیر پوسٹل سروسز اسعد محمود است جمی نا درشانی ءِ کرے۔ 

متعلقہ مضامینمصنف کی طرف سے مزید