کوئٹہ۔ 23 ستمبر (اے پی پی) بلوچستان اسمبلی نا باسک، سینئر سیاستدان رند قبیلہ نا سروک سردار یار محمد رند پارینے کہ پِر و نوکاپ آن ضلع کچھی ءِ بھاز نسخان رسینگانے و مچ آ انفراسٹرکچر بھس مسنے ہنداخاطرآن بلوچستان حکومت نوکاپ زہمی تے ہلہلہ ئی بنداو تیا پین فنڈ و خور اتون اوار تمبو ہم فراوان کے۔ داخیال آتا درشانی ءِ او ڈھاڈر اٹی نوکاپ آن زہمی مروک آ خلقی علاقہ خانواہ پیردوپاسی و نغاری چاکر ماڑی ٹی نسخان تاجاچ ءِ ہلسا صحافی تتون گپ وتران اٹی کرے۔ داوخت آ سردار زادہ میر بیبرگ رند و علاقائی متبر و وڈیرہ محمد شریف کھوسہ میر محمد بخش شاہوانی، وڈیرہ علی احمد رند، ڈسٹرکٹ ہیلتھ آفیسر کچھی لیاقت علی رند و ایلو شخصیت آک ہم اوڑتون اوار ئسر۔ اسسٹنٹ کمشنر ڈھاڈر فہد شاہ راشدی صوبائی اسمبلی نا باسک ءِ نوکاپ آن ملوک آ نسخان، زہمی تا امداد و بحالی نا بابت معلومدار کرے صوبائی اسمبلی نا باسک پارے کہ پِر و نوکاپ نا سوب آن بھلو کچ اسے آ بھسکاری مسنے ، مخلوق نا اُرا، ساہدار، کشاری ڈغار، رابطہ پول و سڑک نوکاپ نا زداٹی بسنو و زہمیک بے چھت آن رہینگ انگ آ بیوس ءُ، داوڑنا حالیت آتیٹی نن ہر کہول آ زہمی تا امداد و بحالی کن کوشست کننگ اٹی اُن۔ اوپارے کہ او ذاتی وڑاٹ زہمی تے خور و دوائی تا فراوانی آن بیدس اوفتا ہرممکن کمکاری ءِ برجاتخک وخت اس کہ ضلعی انتظامیہ تینا کچ اٹنگا وسیلہ غاتیٹی رہینگسا کاریم کننگ ءِ ہرا زہمی تیکن گنج اس افس۔ اوپارے کہ بلوچستان حکومت انسانی ہمدردی نا رداٹ زہمی تے ہلہلہ ئی بنداو تیا کمکی سرجزآتے برجاتخنگ کن پین فنڈ و خور آن بیدس موسم نا شدت آن بچفنگ کن تمبو ہم فراوا ن کے۔ اوڈھاڈر نا زہمی علاقہ غاتے نوکاپ آن رکھ جوڑ کننگ کن تینا فنڈ آن رکھی بند تفنگ نا پڑو کرے۔ اوپارے کہ او زوت مچ آ حلقہ نا دورہ ءِ کیک تانکہ نسخان تا سہی کساس ءِ خلنگ مرے۔ اوپارے کہ ضلع کچھی ٹی نوکاپ آن مروک آ نسخان تا پوروی و بحالی نا کاریم تیٹی کمکاری کن بنجائی و صوبائی حکومت تون ہیت کننگک۔
