اسلام آباد ۔ 23 ستمبر (اے پی پی) امریکی صدر جوبائیڈن پاکستان اٹی نوکاپ آن پد مشکل انسانی حالیت آتیٹی پاکستان نا کمک ءِ برجاتخنگ نا عزم انا درشانی ءِ کرینے وخت اس کہ وزیراعظم محمد شہباز شریف نوکاپ زہمی تا کمک کن جہانی برادری نا پن کلہو و پاکستان نا مخ تفی آ امریکی صدرنا منت واری ءِ ہرفے۔ وزیراعظم آفس نا میڈیا ونگ انا کنڈآن جاری بیان نار داٹ وزیراعظم شہباز شریف نا امریکی صدر جوبائیڈن تون اوڑدہی مس ، دا اوڑدہی اقوام متحدہ نا جنرل اسمبلی نا 77 می دیوان نا وخت آ مس۔ اوڑدہی ٹی امریکی صدر جوبائیڈن پاکستان اٹی تباہ کن نوکاپ اٹی سد آ مرک آتیا است ہسونی و زہمی خاہوت آتون ہمدردی نا درشانی ءِ کرے۔ وزیراعظم شہباز شریف امریکی صدر نا کنڈآن است ہسونی و ہمدردی نا درشانی آ اونا منت واری ءِ ہرفے، وزیراعظم نوکاپ زہمی تا کمک کن جہانی برادری نا پن کلہو و پاکستان نا مخ تفی آ امریکی صدر نا خاص وڑاٹ منت واری ءِ ہرفے۔ وزیراعظم امریکی ادارہ جہانی شونداری (یو ایس ایڈ) نا سروک نا دورہ پاکستان و امداد گدریفنگ آ ہم امریکی حکومت و الس نا منت واری ءِ ہرفینے۔